Атырауда блогер Құралай Болатованы соққыға жығу ісі бойынша сот үкімі шықты

Іс материалдарына сәйкес, жанжал Стамбұлға жоспарланған, бірақ жүзеге аспаған сапардан кейін басталған. Жәбірленуші сапар үшін 100 мың теңге аударған. Ақшаны қайтаруды талап еткеннен кейін, Болатованың айтуынша, оған қоқан-лоққы жасала бастаған.

Кейін айыпталушылар оны қала сыртына – зират аумағына алып кеткен. Сол жерде әйелдер арасында жанжал туындап, жәбірленушіні ұрған. Болатованың сөзінше, оны қорлап, кемсітіп, қорқытқан. Одан кейін оны айыпталушылардың бірінің пәтеріне жеткізген, ол жерден таңертең ғана шығып кеткен.

Сот барысында жәбірленуші өзін еркіндігінен айырылғандай сезінгенін айтып, айыпталушылардың әрекетін ауырлау бапқа қайта саралауды сұраған.

Мемлекеттік айыптаушы әр сотталушыға бір жыл бас бостандығынан айыру жазасын тағайындап, жазаны өтеуді бір жылға кейінге қалдыруды сұрады. Жәбірленуші тарап нақты бас бостандығынан айыруды және моральдық әрі материалдық шығынды өтеуді талап етті. Ал сотталушылар азаматтық талап сомасын азайтуды өтінді.

Сот әрқайсысына бір жыл бас бостандығынан айыру жазасын тағайындап, оның орындалуын сол мерзімге кейінге қалдырды.

Сонымен қатар, сотталушылардан жәбірленушінің пайдасына 1 миллион теңге моральдық өтемақы және 2,9 миллион теңге материалдық шығын өндірілді.