BBC Трамптан кешірім сұрап, бірақ өтемақы төлеуден бас тартты

Алайда корпорация Трамп талап еткен қаржылай өтемақыны төлеуден үзілді-кесілді бас тартты. Бұл туралы BBC 13 қарашада таратқан ресми мәлімдемесінде хабарлады.

BBC басшысы Самир Шах Ақ үйге жолдаған хатында Трамптың 2021 жылдың 6 қаңтарында  Капитолий ғимаратына шабуыл жасалған күні  айтқан сөзін монтаждау кезінде қателіктер жіберілгенін мойындады. Осыған байланысты даулы бағдарлама BBC платформаларында қайта көрсетілмейді.

Даулы фильм қалай жасалды?

«Трамп: екінші мүмкіндік?» атты деректі фильм АҚШ-тағы 2024 жылғы президенттік сайлау алдында эфирге шыққан. Онда Трамптың 6 қаңтардағы сөзінің үш бөлігі біріктіріліп берілген. Мұндай монтаж көрермендерге Трамп өз жақтастарын наразылыққа итермелегендей әсер қалдырған.

Ақ үй бұл жағдайды «жалған ақпарат тарату» деп бағалап, Трамптың адвокаттары BBC-ді 1 миллиард долларға сотқа беретінін ескертті. Олар BBC-ден ресми түрде деректі фильмді жоққа шығару, кешірім сұрауды және өтемақы талап еткен.

BBC басшылығының отставкасы

Даудан кейін BBC-дің бас директоры Тим Дэйви және BBC News бөлімінің жетекшісі Дебора Тернесс қызметінен кететінін мәлімдеді. Дэйви өз хатында BBC-дің «мінсіз емес» екенін айтып, орын алған мәселелерге толық жауапкершілік алатынын жеткізді.

Тернесс те жағдай үшін жауапты екенін мойындағанымен, BBC News-ке қатысты партияшылдық немесе саяси біржақтылық туралы айыптауларды жоққа шығарды.