Еуро-2024: Бізді «ежелгі қарсыластар» күтіп тұр

Осы уақытқа дейін құрлық біріншілігіне тікелей жолдама алған 20 құрама және жарысты өткізуші Германияның командасы, оған қоса тағы 3 ықтимал құрама – барлығы 24 үздіктің тағдырын әлемге аты әйгілі бұрынғы футболшылар шешті.

2020 жылғы Еуропа чемпионы Италия құрамасы атынан даңқты қақпашы Джанлуиджи Буффон құрлық кубогын ортаға алып шықты. Уесли Снейдер (Нидерланды), Бриан Лаудруп (Дания), Сами Хедира (Германия), Давид Силва (Испания), Стив Макманаман (Англия), Блез Матюиди (Франция), Ангелос Харистеас (Грекия), Рикарду Куарежма (Португалия) сияқты танымал экс-футболшылар тартқан жеребеде үздік құрамалар мынадай топтарға бөлінді:

А тобы. Германия, Шотландия, Венгрия, Швейцария

В тобы. Испания, Хорватия, Италия, Албания

С тобы. Словения, Дания, Сербия, Англия

D тобы. Ұлттар лигасы А дивизионы плей-офф жеңімпазы (Польша, Эстония, Уэльс, Финляндия құрамаларының бірі), Нидерланды, Австрия, Франция

Е тобы. Бельгия, Словакия, Румыния, В дивизионы плей-офф жеңімпазы (Босния және Герцеговина, Украина, Израиль, Исландия құрамаларының бірі)

F тобы. Түркия, С дивизионы плей-офф жеңімпазы (Қазақстан, Грекия, Грузия, Люксембург құрамаларының бірі), Португалия, Чехия.

Қазақстан құрамасы келесі көктемде Ұлттар лигасының плей-офф кезеңін сәтті өткізсе, өз тарихында тұңғыш рет ірі турнирлердің топтық кезеңінде ойнайды. Ол үшін, әрине, 21 наурызда – Грекиядан, 26 наурызда Грузия-Люксембург кездесуінің жеңімпазынан басым түсуі керек.

Біздің топтағы үш құрама да бұрын Қазақстаннан түрлі іріктеу кезеңдерінде басым түсті. Түркия – Қазақстанды 6 ресми матчта жеңген жалғыз құрама. Португалия – 2003 жылы жолдастық кездесуде, Euro-2008 іріктеу кезеңінде, жалпы 3 кездесуде басымдық танытты. 2003 жылы даңқты Криштиану Роналду Қазақстанға қарсы кездесуде Португалия сапындағы алғашқы кездесуін өткізді. Ал Чехия құрамасы 2016 жылғы Еуропа чемпионатының іріктеуінде Қазақстанды 4:2 және 2:1 есептерімен тұқыртты. Демек, Еуропа чемпионатының финалдық кезеңіне шыға қалсақ та, бізді оңай қарсыластар күтіп тұрған жоқ.

Құрлық додасы Германияның 10 қаласында өтеді. 14 маусымға Мюнхен қаласында жоспарланған беташар ойында Германия және Шотландия құрамалары кездеседі.

Қазақстан құрамасы бұл сынға шыққан жағдайда ойын кестесі мынадай болмақ:

18 маусым. Дортмунд. Қазақстан – Түркия

22 маусым. Гамбург. Қазақстан – Чехия

26 маусым. Гельзенкирхен. Қазақстан – Португалия

Euro-2024 турнирінің ресми бойтұмары Альберт қонжығы болады. Ол ортаға Германия құрамасының аты жазылған қағазды алып шығып, жеребені бастап берді. Чемпионаттың ресми добын Давид Силва таныстырды.

Ұлттар лигасы: әзірше соңғы қоржындамыз

УЕФА 2024/2025 маусымдағы Ұлттар лигасына қатысатын құрамалар тізімін жариялады. Қазақстан құрамасы өз тарихында тұңғыш рет В дивизионында ойнайды.

Ұлттар лигасының жаңа маусымының жеребесі 2024 жылдың 8 ақпанында тартылады.

В дивизионы төрт қоржынға бөлінген:

1 қоржын: Австрия, Чехия, Англия, Уэльс

2 қоржын: Финляндия, Украина, Исландия, Норвегия

3 қоржын: Словения, Ирландия, Албания, Черногория

4 қоржын: Грузия, Грекия, Түркия, Қазақстан

Қазақстан өз қоржынындағы төрт құрамамен кездесе алмайды.

Ұлттар лигасының жаңа маусымы 2024 жылдың қыркүйегінде басталып, 2025 жылдың маусым айында мәреге жетеді. Қазақстан құрамасына бұрын кездеспеген Уэльс, Норвегия және Ирландия құрамалары қарсылас атануы мүмкін.

Ұлттар лигасының соңғы кезегінде отандастарымыз С дивизионының 3 тобында ойнап, 13 ұпаймен жеңімпаз атанды. Қазақстан Словакияны (2:1, 1:0), Әзербайжанды (2:0, 0:3) және Беларусьті (1:1, 2:1) артқа тастап, өз тарихында тұңғыш рет бір саты жоғары көтерілді.

Осы Ұлттар лигасындағы жақсы нәтижесіне орай Қазақстан әлі де Euro-2024 финалдық кезеңіне шығудан үмітін үзген жоқ.

Ұлттар лигасына Ресей құрамасы әлі де қатыса алмайды. Ал Беларусь С дивизионының 4 қоржынында тұр.

Есей Жеңісұлы