Иран билігі наразылықтар кезінде қаза тапқандардың санын алғаш рет жариялады

 Бұл көрсеткіш бұған дейін шетелдік құқық қорғау ұйымдары келтірген деректерден едәуір төмен.

Иран кейінгі апталардағы оқиғалар салдарынан 3 117 адам қаза тапқанын мәлімдеді. Бұл ақпаратты ирандық ресми ақпарат құралдары да растады.

Қаза тапқандардың 2 427-сі бейбіт тұрғындар мен қауіпсіздік күштерінің қызметкерлері. 

Ресми мәлімдемеде деректер Иранның сот жүйесіне қарайтын сот-медициналық сараптама ұйымының мәліметтеріне сүйеніп жасалғаны айтылған. Билік болған оқиғаларды «террористік сипаттағы инциденттер» деп бағалап, қаза тапқандардың едәуір бөлігін бейберекет атыс пен зорлық-зомбылықтың құрбаны болған «кездейсоқ өтіп бара жатқан азаматтар» деп атады. Сонымен қатар, кейбір демонстранттардың халық көп жиналған жерде «ұйымдасқан террористік элементтер» тарапынан өлтірілгені де мәлімделді.

Бұл 2025 жылдың желтоқсан айының соңында басталған наразылықтардан бері жарияланған алғашқы ресми есеп. Алғашында Тегеранда өршіген шерулер елдегі экономикалық жағдайдың нашарлауы, ұлттық валютаның күрт құнсыздануы және инфляцияның өсуімен байланысты болған. Кейін наразылықтар Иранның өзге қалаларына да тараған.

Бұған дейін шетелдік құқық қорғау ұйымдары анағұрлым жоғары көрсеткіштерді жариялаған еді. Атап айтқанда, АҚШ-та орналасқан, Иран билігін сынға алып жүрген HRANA агенттігі 4,5 мыңнан астам адамның қаза тапқанын, олардың басым бөлігі наразылықтарға қатысушылар болғанын мәлімдеген.

Иран билігі, соның ішінде президент Масуд Пезешкиан мен сыртқы істер министрі Аббас Арагчи, бұл мәліметтерді бұған дейін ашық түрде жоққа шығарған болатын.