Иранның жоғарғы көшбасшысы жараланғаннан кейін Мәскеуге жеткізілуі мүмкін

Дереккөздің мәліметінше, операция қатаң құпия жағдайда жүргізілген. Эвакуация туралы шешім 10 наурызда Ресей мен Иран президенттерінің телефон арқылы сөйлесуінен кейін қабылдануы ықтимал. Кремль сол күні Владимир Путиннің Иран президенті Масуд Пезешкианмен сөйлескенін растағанымен, Хаменеи Мәскеуде ем алып жатыр деген ақпарат ресми түрде расталмаған.

Басылымның тағы бір дереккөзі Хаменеи Мәскеуге жеткізілгеннен кейін оған «сәтті операция» жасалғанын, қазір ол Путин резиденцияларының біріндегі арнайы клиникада ем қабылдап жатқанын айтады.

Дереккөздің сөзінше, Моджтаба Хаменеиді Мәскеуге эвакуациялауға тек соғыс жағдайында қажетті медициналық көмекті қамтамасыз етудің қиындығы ғана емес, сонымен қатар Израильдің жаңа иран көшбасшысын жоюы мүмкін деген қауіп те себеп болған. Иран арнайы қызметтері дәрігерлер арқылы оның нақты орналасқан жері туралы ақпарат таралып кетуі мүмкін деп алаңдайды.

Al Jarida басылымының тағы бір сұхбаттасы Иранда Моджтаба Хаменеи атынан жарияланған алғашқы үндеудің шынайылығына күмән барын айтады. Оның пікірінше, мәтіннің авторы Ұлттық қауіпсіздік жоғары кеңесінің хатшысы Али Лариджани болуы мүмкін, өйткені үндеудің мазмұны оның бұрынғы мәлімдемелерімен ұқсас.

Сол үндеуде Иран АҚШ-пен соғысты жалғастыратыны және әлемдік мұнай жеткізілімінің шамамен 20 пайызы өтетін Ормуз бұғазындағы блокаданы сақтайтыны айтылған.

Алайда Иран көшбасшысының Ресейге жеткізілгені туралы ақпарат әзірге ресми дереккөздер арқылы расталған жоқ. Бұған дейін Reuters агенттігі ирандық шенеунікке сілтеме жасап, Моджтаба Хаменеи жеңіл жараланғанын, бірақ өз міндеттерін атқаруды жалғастырып жатқанын хабарлаған. Израиль тарапы да осыған ұқсас бағалау берген: олардың мәліметінше, Иранның жаңа көшбасшысы жараланғанымен, жарақаты ауыр емес.

Осы жағдай аясында Иран билігі Хаменеи ауыр жағдайда деген ақпаратты ресми түрде жоққа шығарып отыр. Иранның сыртқы істер министрі Аббас Аракчи 14 наурызда Reuters агенттігіне берген сұхбатында жоғарғы көшбасшының жағдайы туралы тараған қауесеттерге жауап беріп, «онымен ешқандай мәселе жоқ» деп мәлімдеді.

Бұл қауесеттердің жаңа толқыны Моджтаба Хаменеи тағайындалғаннан бері көпшілік алдына шықпағанынан кейін күшейді. Соның салдарынан шетелдік медиада оның жеңіл жараланғаны туралы мәліметтен бастап ауыр жарақат алды деген нұсқаларға дейін түрлі болжамдар тарала бастады.