Италиядағы музейде ірі ұрлық: үш бірегей туынды жоғалды

Оқиға туралы ақпаратты полиция өкілі 29 наурыз, жексенбі күні италиялық БАҚ-қа сілтеме жасап, AFP агенттігіне растады. Мәліметтерге сәйкес, ұрлық бір апта бұрын – 22 наурыздан 23 наурызға қараған түні болған.

Ұрланған туындылар:

• Пьер-Огюст Ренуар-дың кеш кезеңіне жататын «Балықтар» картинасы;

• Поль Сезаннның қалам және акварельмен салынған «Шиелі натюрморт» еңбегі;

• Анри Матисстің «Балкондағы одалиска» акварелі.

Хабарларға қарағанда, беттерін капюшонмен жапқан ұрылар алдын ала жоспарланған әрекет жасаған. Қор өкілдері бұл оқиғаны «жоспарланған қылмыс» деп бағалап отыр. Сонымен бірге бейнебақылау жүйесі мен полиция және күзет қызметінің жедел әрекеті салдарынан оқиға одан да ауыр зардапқа ұласпағаны айтылды.

Ұрланған картиналардың болжамды құны бірнеше миллион еуроға бағалануда. Қазіргі уақытта тергеу жүргізіліп жатыр.

Аталған қор италиялық өнертанушы әрі коллекционер Луиджи Маньянидің атымен аталған. Мұнда Тициан, Альбрехт Дюрер, Питер Пауль Рубенс және Франсиско Гойя сияқты шеберлердің туындылары да сақталған. Бұл музей Италиядағы ең маңызды көркем коллекциялардың бірі саналады.

Бұл соңғы уақытта өнер әлемінде болған жалғыз шулы қылмыс емес. 2025 жылғы 19 қазанда Лувр музейінен Франция монархтарына тиесілі, жалпы құны шамамен 88 миллион еуро болатын бағалы әшекейлер ұрланған еді. Қашу кезінде ұрылар императрица Евгенияның гауһар мен жақұтпен әрленген тәжін жолда қалдырып кеткен.

Аталған іс бойынша бірнеше адам ұсталып, кейбіріне айып тағылғанымен, әшекейлер әлі табылған жоқ. Хабарларға қарағанда, ұрылар кейін Израильдегі бір компания арқылы музеймен келіссөз жүргізіп, ұрланған заттарды ақшаға қайтаруды ұсынған, алайда музей басшылығы бұл ұсынысты қабылдамаған.

Қараша айында интернетте Украина Ұлттық жемқорлыққа қарсы бюросы түсірді деген бейне тарады. Онда ұрланған бұйымдар украиналық миллиардер, президент Владимир Зеленскийдің бұрынғы серігі Тимур Миндичтің үйінен табылғаны айтылған. Алайда DW жүргізген фактчекинг бұл видеоны жалған деп таныды – оның бір бөлігі жасанды интеллект көмегімен жасалған.