Карантинге байланысты табыссыз қалғандарға тамызда 21 250 теңгеден төленеді

Билік осы аралықта жұмыссыз қалғандарға 42500 теңгенің (шамамен 102 доллар) жартысын — 21250 теңге (шамамен 51 доллар) төлейді.

Бұл туралы 30 шілде күні вице-премьер Ералы Тоғжанов және денсаулық сақтау министрі Алексей Цойдің брифингінде айтылды.

"Карантин ұзартылғаны үшін міндетті түрде төлем төленеді. Бірақ 42500 теңге соманың жартысы ғана — 21 250 теңге беріледі" деді Тоғжанов.

Бұған дейін карантин кезінде табыссыз қалған азаматтарға үкімет ең төменгі жалақы мөлшерінде, яғни 42 500 теңгеден төлеген еді. Еңбек және халықты әлеуметтік қорғау министрлігінің айтуынша, шілдеде бұл қаржылай көмек 1,8 млн адамға берілген.

Билік өкілдерінің айтуынша, бұл жолы да азаматтарға проактивті форматта (автоматты) жәрдемақы тағайындау қарастырылған. Бұған дейін кейбір азаматтар мемлекет берген қаржылай көмектің мардымсыз екенін айтып шағымданған.