«Қайрат» ФК дәрігері Астана әуежайында «бомба» туралы сәтсіз әзілі үшін ұсталды

Алдын ала мәлімет бойынша, қауіп расталмаған, айтылған сөз сәтсіз әзіл болған.

@Astana_live24 порталының хабарлауынша, оқиға ішкі рейстер терминалындағы Air Astana әуе компаниясының №210 рейсіне тіркелу сәтінде болған. Туралиев Д. есімді жолаушы авиациялық қауіпсіздік қызметкерінің сұрағына жауап бере отырып, әзіл ретінде өзінде «бомба» бар екенін айтқан.

Бастапқы әрекет ету шеңберінде терминалға авиациялық қауіпсіздік қызметінің кинологиялық тобы мен полиция жасағы шақырылған. Жолаушы рейстен түсіріліп, оған қатысты әкімшілік хаттама толтырылған.

Дереккөз мәліметінше, аталған азамат «Қайрат» футбол клубының дәрігері. Оқиға Қазақстан Суперкубогы үшін өткен матчтан кейін болған. Онда «Қайрат» «Тобылдан» пенальти сериясында 4:5 есебімен жеңілген.

Әуежай өкілдері мұндай мәлімдемелердің — әзіл түрінде айтылса да — заң бұзушылық болып саналатынын және Қазақстан заңнамасына сәйкес жауапкершілікке әкелуі мүмкін екенін еске салады.