Жазылу
Қазақстан әлеуметтік маңызы бар тауарлардың бұрынғы бағасын ұстап отыр
2025 жылдың қорытындысы бойынша әлеуметтік маңызы бар азық-түлік тауарларының (СМАТ) бағалар индексі 8,6%-ды құрады. Бұл туралы ҚР Сауда және интеграция министрлігінің кеңейтілген алқа отырысында айтылды. Нәтижесінде Қазақстан Еуразиялық экономикалық одақ елдері арасында әлеуметтік маңызы бар өнімдер бойынша ең төмен баға деңгейін сақтап отыр.
Мұндай көрсеткішке қол жеткізуге бірқатар жүйелі шаралар ықпал етті. Атап айтқанда, сауда үстемелеріне бақылау күшейтілді, өңірлік комиссиялар мен тұрақтандыру қорларының жұмысы жандандырылды, маусымаралық кезеңде нарықты тауармен қамтамасыз ету шаралары қабылданды. Сонымен қатар сауда акциялары мен ауыл шаруашылығы жәрмеңкелері тұрақты түрде ұйымдастырылып, халыққа қолжетімді бағамен өнім сатып алуға мүмкіндік берілді.
Инфляциялық жағдайды ескере отырып, әлеуметтік маңызы бар тауарлар тізімі уақытша 19 атаудан 31 атауға дейін кеңейтілді. Жаңартылған тізім бойынша 800 ірі тауар жеткізуші (реализатор) айқындалып, олардың деректері жергілікті атқарушы органдарға жолданды.
Тауар нарықтарына жүргізілген талдау және жекелеген өнімдердің инфляция құрылымына қосқан үлесі негізінде тоғыз басым тауардың тізімі қалыптастырылды. Олардың қатарына қырыққабат, сәбіз, картоп, пияз, күнбағыс майы, ұн, сиыр еті, күріш және макарон өнімдері (рожки) енгізілді. Бұл өнімдер бойынша маусымдық баға ауытқулары кезеңінде басым реттеу шаралары қамтамасыз етіледі.
Жалпы қабылданған шаралар ішкі нарықтағы баға тұрақтылығын сақтауға және халықтың әлеуметтік тұрғыдан осал топтарын қолдауға бағытталған.
