Қазақстанда актер агрессивті әрекеті үшін қамауға алынды

Оқиғаға әлеуметтік желіде оның әріптесі жариялаған бейнежазба себеп болған. Оның айтуынша, актер түсірілім алдында өзін оятуды өтінген. Алайда қоңырау шалған кезде ол агрессивті жауап берген.

Полиция мәліметінше, бұл жағдай бойынша Медеу аудандық полиция басқармасының қызметкерлері тексеру жүргізген.

«Оқиғаға қатысушылардың барлығы анықталды. Құқық бұзушы полиция бөліміне жеткізілді», — деп хабарлады ведомство.

Құқық қорғау органдарының дерегінше, ер адам агрессивті мінез көрсетіп, қызға балағат сөздер айтып, қоғамға ашық құрметсіздік танытқан.

Оған қатысты ұсақ бұзақылық фактісі бойынша әкімшілік іс қозғалып, материалдар сотқа жолданған. Сот 10 тәулікке қамау жазасын тағайындады.

Полиция өкілдері кез келген агрессия мен қоғамдық тәртіпті бұзу әрекеттері заң аясында жауапқа тартылатынын атап өтті.