Қазақстандық депутаттың жиені отбасындағы кезекті жанжалдан кейін қылмыстық жауапкершілікке тартылуы мүмкін

15 наурыз күні Рахат Тұрлыханов жұбайын ұрып-соқты деген күдікпен ұсталды.
Ал 16 наурызда оның ісі Алматы қаласының мамандандырылған ауданаралық әкімшілік құқық бұзушылықтар жөніндегі сотында ӘҚБтК-нің 73-бабы («Отбасылық-тұрмыстық қатынастар саласындағы құқыққа қарсы әрекеттер») бойынша қаралды.

Хаттамаға сәйкес, ол үйінде әйелімен жанжал шығарып, оны балағаттап, қорқытып, айқайлап, үйдегі тыныштықты бұзған.

Соттағы жағдай

Сот барысында айыпталушының әйелі күйеуінің өзін ұрмағанын және қорламағанын айтты. Оның сөзінше, олардың арасында тек ажырасуға байланысты жанжал болған.

Рахат Тұрлыханов та жанжал болғанын мойындап, бірақ ешқандай күш қолданбағанын мәлімдеді.

Қылмыстық іс бойынша тексеру

Тараптардың уәждерін тыңдаған сот әкімшілік істі тоқтатты, бірақ материалдарды Алматы қаласы Медеу аудандық прокуратурасына қылмыстық құқықбұзушылық белгілерін тексеру үшін жіберді.

— «Сот қаулысымен іс материалдары ҚР ӘҚБтК-нің 742-бабына сәйкес прокурорға және сотқа дейінгі тергеп-тексеру органына жолданды. Бұл жәбірленушінің құқық қорғау органдарына алғаш жүгінген кезде дене жарақатын келтіру туралы мәлімдемесін ескере отырып жасалды», — делінген сот хабарламасында.

Бұған дейінгі жағдай

Еске салайық, 2024 жылдың қаңтарында Рахат Тұрлыханов жұбайын ұрып-соққаны үшін сот алдында жауап берген. Ол кінәсін мойындап, ал әйелі татуласқанын айтқан.

Алайда құқықбұзушылықтың қайталануына байланысты сот оған 10 тәулік әкімшілік қамау жазасын тағайындаған.

Кейін ерлі-зайыпты видеоүндеу жариялап, отбасында бәрі жақсы екенін мәлімдеген. БАҚ мәліметінше, бұл бір жыл ішіндегі екінші осындай жағдай болған.