Қытайлық CNNC компаниясы Қазақстанға жеңілдетілген бағамен АЭС салуды ұсынды

Ұсыныс әрқайсысы 1 ГВт болатын екі энергоблокты қамтиды және салу-пайдалану-беру (БОТ) схемасы бойынша нысанды бес жыл ішінде жеткізуді қарастырады. Бұл ұсыныс Түркиядағы «Росатом» компаниясы салып жатқан «Аккую» жобасынан әлдеқайда арзан екені айтылған.  

Қазақстанда атом электр станцияларын салу конкурсына CNNC-тен басқа кореялық KHNP компаниясы, ресейлік «Росатом» және француздық EDF компаниялары қатысуда. Бастапқыда Қазақстанның Энергетика министрлігі қуаттылығы 2,4 ГВт болатын атом электр станциясының құнын 10 жылға жоспарланған құрылыс мерзімімен 10 миллиард долларға бағалады. Кейін «Самұрық-Қазына» қорының еншілес ұйымы «Қазақстан атом электр станциялары» компаниясының өкілдері жобалық құнын 15 миллиард долларға дейін ұлғайтты, деп жазады басылым.

Салыстыру үшін айта кетейік, «Росатом» Түркияда 2018 жылдан бері жалпы қуаты 4,8 ГВт болатын төрт энергоблокпен «Аккую» АЭС-ін салуда, оның құны 24–25 миллиард долларды құрайды. Осылайша, бір қытайлық энергоблоктың құны 1 ГВт-қа 2,8 миллиард долларды құрайды, ал ресейлік блок 1,2 ГВт үшін 6,25 млрд доллар тұрады.

Қазақстанда атом электр станциясын салу туралы шешім республикалық референдумда қабылданады.