Көк тумен қоштасу: теңіз жаяу әскерінің абыройы мен патриоттық рухы

Салтанатты рәсім дәстүрге сай әскери оркестрдің әуенімен басталды. Сап түзеген сарбаздар көк тумен қош айтысып, бір жылдық қызметтің әр күнін еске алды. Бұл – жай ғана әскердегі рәсім емес, патриотизм мен азаматтық борыштың көрінісі. Әр сарбаз үшін ту алдында иілу – ел мен жерге адалдық антын қайта жаңғырту іспетті.

Салтанатқа Ақтау гарнизонының командирлері, Қарулы Күштердің ардагерлері, «Аналар жүрегі» комитетінің өкілдері, сарбаздардың ата-аналары мен жақындары қатысты. Қолына туды ұстаған теңіз жаяу әскері – елдің айбыны мен мақтанышы. Командирлер жауынгерлерге адал қызметі үшін алғыс айтып, олардың есімдері әрқашан теңіз жаяу әскерінің тарихында сақталатынын атап өтті.

Өткен бір жыл ішінде сарбаздар күрделі дайындық кезеңінен өтті: жаңа әскери техниканы меңгерді, атыс және тактикалық машықтарын жетілдірді, жауынгерлік оқу-жаттығуларға қатысты. Ең маңыздысы – «Айбалта–2025» атты ірі әскери оқу-жаттығудағы қатысуы. Бұл жаттығуда теңіз жаяу әскері жоғары кәсіби дайындық пен бірлік танытып, командалық іс-қимылдың мінсіз үлгісін көрсетті.

Теңіз жаяу әскері – Қазақстанның Қарулы Күштеріндегі ең айрықша бөлімдердің бірі. Олар тек шекараны қорғап қана қоймай, теңіздегі қауіпсіздікті қамтамасыз ету, стратегиялық маңызды нысандарды күзету, халықаралық миссияларға қатысу секілді жауапты міндеттерді атқарады. Сондықтан олардың әскери антқа берік болуы – ел тәуелсіздігінің тірегі.

Биыл теңіз жаяу әскері елордада өткен Ұлы Жеңістің 80 жылдығына арналған әскери парадқа қатысып, мінсіз сап түзеді. Бұл – жас сарбаздардың рухын көтеріп, олардың ел алдындағы борышын сезіндіретін ұлы сәт болды. Қазақстанның туы желбірегенде, әр жауынгердің көкірегін мақтаныш кернеді.

Рәсім соңында борышын мінсіз атқарған сарбаздарға марапаттар мен алғыс хаттар табысталды. Олардың жүзінен риясыз қуаныш пен жауапкершілік сезімі байқалды. Солардың бірі Петропавлдан келген Равиль Қасенов өз әсерімен бөлісіп:
«Бір жыл көзді ашып-жұмғандай өте шықты. Теңіз жаяу әскері сапында қызмет еткенім – өмірімдегі ең үлкен мақтаныш. Енді мен тельняшка мен қара беретімді абыроймен тағып жүремін. Командирлеріміз бізге нағыз тәртіп пен ерліктің не екенін үйретті», – деді.

Көк тумен қоштасқан сарбаздар енді бейбіт өмірге оралса да, олардың бойында туған жерге деген сүйіспеншілік, елге адалдық рухы мәңгі сақталады. Себебі патриотизм – тек әскери саптағы ант емес, ол – күнделікті өмірде ел мүддесін қорғауға дайын болу.

 Ақтауда өткен бұл рәсім – жай ғана әскери салтанат емес, ол ұлттың рухын көтеретін патриотизм сабағы болды. Көк ту астында ант берген сарбаздар ел болашағын қорғауға әзір жаңа буын патриоттардың қатарын толықтырды. Қазақстанның айбыны теңізде де, аспанда да, жүректе де желбіреп тұр.