Жазылу
Мемлекеттік қызмет істері агенттігі Серік Сәпиевті қызметтік жанжалда кінәлі деп таныды
Мемлекеттік қызмет істері агенттігі Қарағанды облысының дене шынықтыру және спорт басқармасының басшысы Серік Сәпиев пен оның орынбасары Дәурен Есімханов арасындағы жанжалға қатысты қызметтік тексеруді аяқтады.
Тексеру қорытындысы бойынша болған оқиғаға басқарма басшысының өзі жауапты деп танылды. Бұл туралы журналист Михаил Козачков өзіне түскен құжатқа сілтеме жасап хабарлады.
Қарағанды облысы бойынша Мемлекеттік қызмет істері агенттігі департаменті жүргізген қызметтік тексеру қорытындысында Серік Сәпиевтің әрекеттерінен мемлекеттік қызметшілердің Әдеп кодексін бұзу белгілері анықталғаны көрсетілген.
Құжатта жанжал 2026 жылғы 21 қаңтарда басқарма орналасқан облыстық мамандандырылған балалар мен жасөспірімдер спорт мектебінің ғимаратында болғаны жазылған. Басшы мен оның орынбасары арасындағы келіспеушілік бөгде адамдардың, соның ішінде спорт ұйымдарының өкілдерінің көзінше төбелеске ұласқан.
Тексеру барысында бұқаралық ақпарат құралдарындағы жарияланымдар, бейнебақылау камераларының жазбалары және жанжалға қатысқан барлық тараптың түсініктемелері зерттелген. Нәтижесінде тараптардың бір-бірін ұстап қалғаны, орынбасардың құлағаны, ал басқарма басшысының есікті тарс жауып, кабинетті тастап кеткені расталған. Агенттік бұл әрекеттер мемлекеттік қызметтің беделіне нұқсан келтіріп, қоғамда резонанс тудырғанын атап өтті.
Қызметтік комиссия Серік Сәпиевтің әріптесіне қатысты әдепсіз әрі орынсыз әрекетке барғанын, ұжымда іскерлік және сыйластық ахуалды сақтауға ықпал етпегенін, соның салдарынан мемлекеттік органның абыройына зиян келгенін мәлімдеді.
Қорытындыда лауазымына немесе бұрынғы жетістіктеріне қарамастан мұндай әрекеттерге жол беруге болмайтыны, ал мемлекеттік орган басшылары кәсіби әрі этикалық мәдениеттің жоғары деңгейін көрсетуге міндетті екені баса айтылған.
Қызметтік тексеру материалдары әрі қарай шешім қабылдау үшін Әдеп жөніндегі кеңестің қарауына жолданды.
Бұған дейін Серік Сәпиев жанжалдың орынбасары тарапынан заңсыз әрекеттерге байланысты туындағанын айтқан болатын. Ал Қарағанды облысының әкімі Ермағанбет Бөлекпаев тексеру нәтижесін күтуді ұсынған. Оқиға бойынша қылмыстық іс тіркелгені де хабарланған, алайда тергеу мүддесіне байланысты оның егжей-тегжейі жария етілмеді.
