Нұр-Сұлтанда бірнеше белсендінің қамалғаны хабарланды

Оларға "бейбіт жиын өткізу ережесін бұзу" бабы (Әкімшілік кодекстің 488-бап, 1-бөлім) бойынша айып тағылған. Халықова мен Тамабаева 26-27 қарашада Еуропа Одағының Қазақстандағы өкілдігі алдында "рұқсат етілмеген" бейбіт акцияға қатысқаны үшін әкімшілік жазаға тартылған. Ал Мұсабаев "Facebook желісінде 16 желтоқсанда митингіге шақыруға үндеді" деп айыпталған.

Sud.kz сайтында белсенділер ісінің сотқа жеткені, судьяның тағайындалғаны туралы дерек бар. Бірақ істің қалай қаралғаны, нақты қандай шешім шыққаны туралы бірде-бір құжат жоқ.

Астаналық белсенді Салтанат Төлегенованың айтуынша, бұған дейін "Қазақстанның демократиялық таңдауы" қозғалысына қатысы бар деп айыпталып, бір жылға бас бостандығы шектелген белсенді Гүлмира Халықова 9 желтоқсанда пробациялық бақылау қызметіне тіркелу үшін барған кезде азаматтық киім киген екі адам оны көлікке отырғызып, алып кеткен. Төлегенованың сөзіне қарағанда жол ортасында көліктің бензині бітіп, жанар-жағар май станциясына тоқтаған кезде Халықова сондағы жұмысшыларға туыстарының телефонын беріп, өзі жайлы ақпарат беріп үлгерген. Халықованың туыстары түнгі 23.30 шамасында Сарыарқа аудандық полиция департаментіне барған кезде полиция бөлімшесінен белсендіні көрген.

"Бірақ туыстары мен жақтастарын ішке кіргізбеген. Бірақ Гүлмира Халықова сол жерден "мені 26-27 күнгі митингі үшін 488-баптың 1-ші бөлігі бойынша он тәулікке қамады деп айтып үлгерген" дейді Төлегенова.

Sud.kz сайтындағы дерекке сәйкес, олардың ісін судья Бауыржан Ахметқалиев қараған. Олардың 10-15 тәулікке қамалғанын Facebook-та қудаланған белсенділер жайлы ақпарат тарататын #IHaveAChoiсe #ActivistsNotExtremists тобы да хабарлады. Полиция мен сот әзірге жауап бермеді.

(Жаңалық толықтырылады).