Путин мен Зеленскийдің кездесу орны Венгрия болуы мүмкін

Алдымен жеке кездесу, кейін үшжақты саммит

АҚШ президенті Дональд Трамп Зеленский және Еуропа лидерлерімен өткен келіссөздерден кейін мәлімдеме жасады. Оның айтуынша, алдымен Путин мен Зеленский жеке келіссөз өткізбек, содан соң үшжақты кездесу ұйымдастырылып, оған Трамптың өзі қатысады.
Reuters агенттігінің дерегінше, мұндай реттілікті Путиннің өзі ұсынған.

Неліктен Венгрия?

Сарапшылардың пайымдауынша, Венгрияның мұндай келіссөз алаңы ретінде таңдалуы бірнеше факторға байланысты:

• Орбанның ұстанымы. Венгрия премьер-министрі Виктор Орбан Мәскеумен байланысын үзбеген санаулы еуропалық көшбасшылардың бірі. Оның энергетикалық саясаттағы прагматизмі Будапештті Мәскеуге жақындатты.

• Будапешттің “бейтарап имиджі”. Венгрия – ЕО мен НАТО мүшесі болғанымен, соңғы жылдары Украинаға қатысты қатқыл қадамдарға бармады. Бұл елді Мәскеу үшін қолайлы диалог алаңы етеді.

• Еуропаға ыңғайлы география. Орналасуы жағынан Венгрия Шығыс пен Батыстың арасындағы “көпір” іспетті.

Келіссөздердің Венгрияда өту ықтималдығы халықаралық қауымдастықта түрлі реакция туғызуда. Кейбір сарапшылар мұны Мәскеудің дипломатиялық жеңісі деп бағалап отыр, себебі ЕО-ның толық қолдауына қарамастан, Путин келіссөзге “ыңғайлы” алаң таңдатуға қол жеткізді. Ал өзгелері Венгрияда кездесу өтсе де, бейбіт келісім ұзаққа созылмайды деп санайды. Өйткені, Путин уақытша бітімді әскери күшін толықтыру үшін пайдалануы мүмкін.