Ресей Қазақстанда ЖЭС салмақшы: жобаның анық-қанығы белгілі болды

ҚР Үкіметі Қазақстан Республикасы мен Ресей Федерациясы арасында Көкшетау, Семей және Өскемен қалаларында көмірмен жұмыс істейтін жылу электр станцияларын салуға қатысты келісім жасасу туралы қаулы жобасын әзірледі. Тиісті жоба «Ашық заңды тұлғалар» порталында 28 желтоқсанға дейін жарияланды.

Жобаға кім жауапты:

Қазақстан тапсырыс беруші ретінде «Самұрық-Энерго» АҚ, ал бас мердігер ретінде «Интер РАО» компаниялар тобына кіретін «ИНТЕР РАО – Экспорт» жауапкершілігі шектеулі серіктестігі Ресей атынан шығады.

Іске асыру кезеңдері:

Бірінші кезең: Электр станцияларының қатты отыннан табиғи газға көшу мүмкіндігін қарастыратын сараптамамен жобалық құжаттаманы әзірлеу.

Екінші кезең: Жұмыс құжаттамасын әзірлеу, жабдықтар мен материалдарды жеткізу, сонымен қатар құрылыс, монтаждау және іске қосу жұмыстары.

Үшінші кезең: Электр станцияларының экологиялық өнімділігін қамтамасыз ететін газды тазарту жүйесі бойынша қызметтерді көрсету.:

Бұған дейін Қазақстанда жаңа жылу электр станцияларының құрылысын Украинадағы әскери әрекеттерге байланысты халықаралық санкцияларға ұшыраған олигархтар Борис Ковальчук пен Игорь Сечинге тиесілі «Интер РАО – Экспорт» компаниясы жүргізетіні белгілі болған еді.

Интер РАО рөлі:

Интер РАО – Экспорттың Қазақстандағы жобаларға қатысуы нысанды жобалау, салу және іске қосу бойынша кешенді қызметтерді ұсынатын EPC(M) мердігері ретінде қарастырылады. Сонымен қатар, олар қазақстандық тапсырыс берушіге жобаларға коммерциялық қарызды қаржыландыруды тартуға көмектеседі.

Санкцияларға байланысты шектеулер:

Интер РАО Украинадағы әскери оқиғаларға байланысты халықаралық санкцияларға ұшыраған Путинге жақын олигархтар – Борис Ковальчук пен Игорь Сечинге тиесілі. Бақыланатын компаниялар осы санкциялардың кесірінен бірнеше рет тиімді келісім-шарттарынан айырылумен бетпе-бет келді. Мысалы, 2023 жылдың тамыз айының соңында американдық General Electric (GE) газ турбиналарын өндіруде Inter RAO компаниясымен ынтымақтастықтан бас тартты.