Сергек камералары енді жаяу жүргіншіні өткізбеген көліктерді де тіркейді

Ішкі істер министрлігі «Сергек» қоғамдық және жол қауіпсіздігі жүйесі бұзушылықтардың жаңа түрлерін тіркейтінін хабарлады. Пилоттық жоба Алматыда басталды.

Енді Сергек жаяу жүргіншілер өткелінде адамдарды елемейтін жүргізушілерді анықтайтын болады.

«Мысалы, көлік жаяу жүргіншінің артынан өтіп кетсе, бұл жол қозғалысы ережесін бұзу болып саналмайды. Алайда жүргізуші жаяу жүргіншіге жол бермей, тоқтамаса, айыппұл салынады. Жаяу жүргінші де, көлік те бір қиылыс аймағында болған жағдайда да әкімшілік құқық бұзушылық тіркеледі», - делінген хабарламада.

Ішкі істер министрлігі 2023 жылдың 11 айында 556 жаяу жүргінші көлік астында қаза тапқанын, оның 478-і өткелдерде болғанын еске салды.

Сонымен қатар, «Сергек» жүргізуші мен алдыңғы жолаушы орындығында қауіпсіздік белдігін тақпаған азаматтарды да анықтамақ.