Шымкент марафоны – бұқаралық спорттың айнасы

Жарыс бағдарламасы түрлі қашықтықты қамтыды: 5, 10, 21 және 42 шақырымдық жүгіру, скандинавиялық жүріс және Экиден эстафетасы (42 шақырымдық топтық жарыс). Жүгірушілер мәреге дейінгі жолды әл-Фараби алаңынан бастап, дәл сол жерге қайта оралды. Әсіресе 42 шақырымдық толық марафон мен Экиден эстафетасы спортшылардың шыдамдылығын сынап, көрермендерге ерекше әсер сыйлады.

Шымкент марафоны кәсіби спортшылардың ғана емес, қарапайым тұрғындардың да ортақ мерекесіне айналды. Мұнда қатысушылардың арасында тәжірибелі желаяқтармен бірге спортты серік еткен жастар, отбасылар және ардагерлер де болды. Жарыс алаңы қала тұрғындарының бірлігін, салауатты өмір салтын ұстануға деген құштарлығын айқын көрсетті.

Ұйымдастырушылар қатысушыларға спорттық сайыс қана емес, шынайы мереке тарту етті. Қала көшелері әуен мен көтеріңкі көңіл күйге толып, спортшыларды қолпаштаған жанкүйерлер ерекше атмосфера қалыптастырды.

Жеңімпаздар мен жүлдегерлерге ақшалай сыйлықтар мен демеушілер ұсынған бағалы заттар табысталды. Бұл марафонның тек спорттық дода емес, жастарды ынталандыратын, спортқа қызығушылықты арттыратын маңызды шара екенін көрсетті.

Шымкент қаласындағы «Shymkent Marathon» – бұқаралық жүгіру спортын насихаттаудың және салауатты өмір салтын қалыптастырудың басты шараларының бірі. Марафон жыл сайын өтеді, қатысушылар саны артып келеді, әрі тек кәсіпқойлар ғана емес, әр жастағы, әр деңгейдегі спорт жанкүйерлері де бақ сынауға мүмкіндік алады. Бұл жарыс қаладағы бұқаралық спорттың дамуына айтарлықтай үлес қосады.

Әкімдіктің қолдауымен ұйымдастырылатын мұндай жарыстар салауатты өмір салтын насихаттап қана қоймай, қала имиджін көтеруге де үлес қосатыны анық. Сондай-ақ марафон туризмді дамытуға, қалаға сырттан келген қонақтардың санын арттыруға ықпал етеді. Бұл өз кезегінде Шымкенттің спорттық орталық ретінде қалыптасып келе жатқанын білдіреді.

Айта кетейік, Шымкент марафоны алғаш рет 2018 жылы басталған. Содан бері тұрақты өтіп келеді. 2021 жылғы жарыс ел Тәуелсіздігінің 30 жылдығына орайластырылып өткізілді. Марафондарда қатысушылар саны 5 мыңнан кем болған емес, оған еліміздің өңірлері мен Өзбекстан, Қырғызстан, Тәжікстан, Моңғолия сияқты көрші мемлекеттерден де келіп қатысатын спортшылар бар. Жарысты ұйымдастыруға қала әкімдігі, жергілікті демеушілер мен фитнес-клубтар атсалысады.

Марафонның қала өміріндегі және қоғамдағы маңызы өте жоғары. Ол ең алдымен салауатты өмір салтын қалыптастыруға оң әсер етеді. Марафон көрермендер мен қатысушыларды денешынықтыруға ынталандырады. Жүгіруге шыққандардың көп болуы халықтың спортқа деген қызығушылығын білдіреді.

Екіншіден, марафон бұқаралық спортты дамытуға ықпал етеді. Мұндай шаралар мектеп, студия, спорт клубтарының жүгіру секцияларын дамытуға оң серпін береді. Жастар арасында тұрақты жаттығулар, жарыстар қалыптасады.

Үшіншіден, қаланы қоғамдық бірлікке шақырады. Жарыста жергілікті тұрғындармен бірге еліміздің басқа өңірлері мен көрші елдердің өкілдері қатысады. Бұл бірлік пен ынтымақтастықтың көрінісі.

Төртіншіден, қаланың оң имиджін қалыптастырып, туризмді дамытады. Ірі спорттық шара ретінде, Шымкент марафоны қаладағы инфрақұрылымның, жолдардың, қызмет сапасының жақсаруына қосымша ықпал етері сөзсіз. Сырттан келген спортшылар мен жолаушылар қалаға назар аударып, аймақта туризм дамиды.

Бесіншіден, марафон жастарға мотивация сыйлап, таланттарды жұртқа таныстырады. Жеңімпаздар мен үздік шыққандарды марапаттау арқылы жас спортшыларға жол ашылады. Көптеген қатысушылар алғаш рет марафонға қатысып, әрі қарай спорттық көрсеткіштерін жақсартуға бел байлайды.

Шымкент марафоны – жай ғана спорт шарасы емес, қала өмірінің маңызды бөлігі. Бұқаралық спортты дамытуда, халықтың денсаулығын нығайтуда, қаланың брендін қалыптастыруда шешуші рөл атқарып отыр. Шымкент марафонының қазіргі ауқымы мен қатысушылар санына қарап, келешекте оның көлемі мен сапасы арта түседі деп болжауға негіз бар.

Еламан Өмірхан

Шымкент қаласы