Жазылу
Тоқаев паралимпиада чемпионы Ербол Хамитовты марапаттады
Тоқаев XIV қысқы Паралимпиада ойындарының чемпионы Ербол Хамитовты Ақордада қабылдады. Мемлекет басшысы тарихи жеңіске қол жеткізген спортшыға алғыс білдіріп, өзі және оның бапкерлері үшін мемлекеттік наградалар табыстады.
Қасым-Жомарт Тоқаев Ербол Хамитовтың Италияда өткен жарыста алтын және қола медаль жеңіп алғанын отандық спорттың үлкен жеңісі ретінде атап өтті. Осы жетістік нәтижесінде Қазақстан жалпы командалық есепте 18-орынға ие болды.
Президент Ерболдың жеңісінің алдындағы символдық сәтті еске салды:
«Паралимпиада ойындарына аттанар алдында саған еліміздің туын табыстадым. Сен бұл сенімді толық ақтап, жеңіспен оралдың. Ербол қазақ халқының қайсарлығын, батылдығын және ерлігін бүкіл әлемге паш етті», – деді Мемлекет басшысы.
Ерекше жетістігі үшін Ербол Хамитовқа «Барыс» орденінің III дәрежесі табысталды.
Чемпионды дайындаған жаттықтырушылар да назардан тыс қалған жоқ. Қасым-Жомарт Тоқаев бапкерлерге, дәрігерлерге және демеушілерге алғысын білдіріп, паралимпиадашылардың өмірін – нағыз ерлік пен темірдей ерік-жігердің үлгісі деп атады.
Мемлекеттік наградалар иеленгендер:
-
Василий Коломиец пен Антон Жданович (Спорттық даярлық орталығының бапкерлері) – «Парасат» ордені;
-
Аслан Тоқбаев («Үміт» клубының жаттықтырушысы, СҚО) – «Құрмет» ордені.
Кездесуді қорытындылай келе, Президент:
«Мұндай әрбір медаль – еліміздегі бұқаралық спортты дамытуға үлкен серпін береді, жас ұрпаққа жарқын үлгі болады», – деді.
Айта кетейік, Ербол Хамитов XIV Қысқы Паралимпиада ойындарында биатлоннан алтын медаль жеңіп алып, шаңғы жарысынан қола жүлдеге ие болған.
