Елена Рыбакина Майамидегі WTA 1000 турнирінің ширек финалына шықты
Қазақстандық теннисші, әлемнің екінші ракеткасы Елена Рыбакина Майамиде өтіп жатқан WTA 1000 санатындағы турнирдің ширек финалына жолдама алды.
1/8 финалда Рыбакина аустралиялық Талия Гибсонмен (әлемдік рейтингте 68-орын) кездесіп, екі сетте сенімді жеңіске жетті — 6:2, 6:3.
Miami Open-2026 турнирінде Елена Рыбакина бұған дейін:
– қазақстандық Юлия Путинцеваны (75-орын) — 6:3, 6:3;
– украиналық Марта Костюкты (28-орын) — 6:3, 6:4 есебімен жеңген болатын.
Ал Талия Гибсон турнир барысында бес матч өткізіп, грузиялық Екатерина Горгодзені (165-орын), өзбекстандық Камилла Рахимованы (82-орын), чехиялық Сара Бейлекті (41-орын), сондай-ақ жапониялық Наоми Осаканы (15-орын) және америкалық Ива Йовичті (17-орын) жеңген.
Майамидегі WTA 1000 турнирінің жалпы жүлде қоры — 9 415 725 доллар. Жекелей сында жеңімпаз 1 151 380 доллар сыйақы және 1000 рейтингтік ұпай алады.
