Түрік жазушысының балаларға арналған кітабы қазақ тіліне аударылды

Осы игі бастамалардың бірі ретінде Түркістанда түрік жазушысы Фатма Гүнердің “Достардың махаббаты” атты балаларға арналған кітабының қазақ тіліне аударылды. Шығарманы қазақ тіліне белгілі журналист, Қазақстан Журналистер одағының мүшесі, «Низами» медалінің иегері Гүлжаз Қарыбек аударған. Іс-шара Түркістан облыстық мәдениет басқармасы мен Ыбырай Алтынсарин атындағы балалар кітапханасының ұйымдастыруымен өтті.

Кештің мақсаты – тек жаңа кітаптың таныстырылымы ғана емес, сонымен бірге түрік және қазақ халықтарының әдеби байланысын нығайту болды. Шараға қатысқан ақындар мен ғалымдар аудармашының еңбегін жоғары бағалап, бұл кітап балалар бойында достық, мейірім және ізгілік қасиеттерін қалыптастыратынын атап өтті. Түркі мәдениетіне тән тағамдар ұсынылған фуршет пен көрме кешке ерекше рең беріп, туындының рухын сезіндіре түсті.

Салтанатты рәсімге Түркістан қаласының зиялы қауымы, ұстаздар, университет оқытушылары мен шығармашыл жастар қатысты. Кітапхана оқырмандары шығармадан көрініс қойып, студенттер иллюстрациялар жасап, өнерпаздар қазақ, түрік және қырғыз тілдерінде ән шырқады. Мұның бәрі – балалар кітабының айналасында ортақ мәдени кеңістік қалыптасып келе жатқанын айқын көрсетті.

Гүлжаз Қарыбектің аудармасы арқылы қазақ оқырманы түрік әдебиетінің жаңа тынысын сезініп, екі халық арасындағы рухани көпір тағы бір кірпішпен бекіді. «Достардың махаббаты» — жай ғана балаларға арналған ертегі емес, ұлттар арасындағы достық пен бауырластықты дәріптейтін маңызды туынды. Осындай еңбектердің көбеюі – бүгінгі қазақ қоғамының рухани дамуы мен болашақ ұрпақтың ой-өрісін кеңейтудің айғағы.