Түркияда қуатты жер сілкінісі тіркелді: 70-ке жуық адам жарақат алды

Жерасты дүмпуі Мармарис қаласына жақын орналасқан Мұғла аймағында қатты сезілді. Түркияның ұлттық хабар таратушысы TRT Haber таратқан ақпаратқа сәйкес, зілзаланың магнитудасы 5,8 балл болып тіркелді.

Түркияның Төтенше жағдайлар басқармасы (AFAD) берген ресми мәліметке сүйенсек, зілзаланың эпицентрі Жерорта теңізі аумағында, ал тереңдігі шамамен 67,91 шақырымды құрады. Жер сілкінісі Мармариске қарасты Мұғла ауданына 10,43 км қашықтықта болған.

Адам шығыны мен зардап шеккендер

Алдын ала мәліметтер бойынша, апат салдарынан 1 адам көз жұмды, тағы 69 адам әртүрлі деңгейде жарақат алды. Медициналық қызметтер зардап шеккендерге қажетті көмекті көрсетіп жатыр. Қауіпсіздік мақсатында аймақ тұрғындары үйлерін тастап, ашық алаңдарға, саябақтар мен бақтарға шығып жатыр.

Инфрақұрылым жағдайы

Мұғла облысының губернаторы Идрис Акбиік мәлімдегендей, табиғи апат өңірдің негізгі инфрақұрылымына айтарлықтай әсер еткен жоқ. Энергиямен жабдықтау, ауыз су, табиғи газ және кәріз жүйелері қалыпты режимде жұмыс істеп тұр. Сондай-ақ, тұрғын үй секторында да ірі зақымданулар тіркелмеген.

Құтқару және тексеру жұмыстары жалғасуда

Қазіргі уақытта өңірде төтенше жағдайлар қызметтері, құтқарушылар және техникалық мамандар тарапынан ауқымды тексеру жұмыстары жүргізілуде. Тұрғын үйлер, әлеуметтік нысандар және маңызды инфрақұрылымдар мұқият тексеріліп, қауіпсіздік шаралары күшейтілді. Сонымен қатар, тұрғындарға жер сілкінісі кезінде өзін-өзі қорғау ережелері жөнінде ақпараттық түсіндіру жұмыстары жүргізілуде.