Жазылу
Украина: Германия Ресейге бейбіт келіссөздерде ымыраға келуге шақырды
АҚШ-тың арағайындығымен Мәскеу мен Киев арасында Украинадағы соғысты тоқтату мәселесі бойынша өткен кезекті келіссөздер раундының қорытындысынан кейін Германия үкіметі Кремльді ымыраға келуге үндеді.
Берлинде өткен брифингте Германия үкіметінің ресми өкілі Штефан Корнелиус Германияның өткен аптада Абу-Дабиде өткен келіссөздерде «айтарлықтай ілгерілеуді» көргісі келгенін айтты.
«Мәскеу әлі де максималистік талаптарынан бас тартпай отыр. Біз Ресейді бұл талаптардан бас тартып, қабылдауға болатын ымыраға бастайтын жолдарды іздеуге шақырамыз», - деді ол.
Украинадағы соғысты аяқтаудың ықтимал шарттары талқыланған екі күндік жабық келіссөздер 5 ақпанда Абу-Дабиде аяқталды. Кездесу барысында Киев пен Мәскеу кезекті тұтқындар алмасу жөнінде келісімге келгенімен, атысты тоқтатуға қарай нақты серпіліс жасалмаған.
Соған қарамастан, келіссөздер қорытындысы бойынша барлық тараптар — Ресей, Украина және АҚШ — белгілі бір ілгерілеу бар екенін мәлімдеді. АҚШ Мемлекеттік хатшысы Марко Рубио шешілмеген мәселелер тізімі «айтарлықтай қысқарғанын», алайда ең күрделі сұрақтардың әлі де күн тәртібінде тұрғанын айтты. Атап айтқанда, Ресей армиясы басып алған Украина аумақтарының болашағы әлі де анықталмаған.
Өз кезегінде Украина президенті Зеленский 7 ақпанда журналистермен кездесуде Вашингтон Киев пен Мәскеу делегацияларына 9 ақпаннан басталатын аптада Майамиде жаңа келіссөздер раундын өткізуді ұсынғанын хабарлады. Украина тарапы бұл кездесуге қатысуға дайын екенін растаған.
Германия үкіметінің өкілі Штефан Корнелиус келіссөздер процесінің жалғасуын қолдайтынын атап өтті.
«Ең маңыздысы – Украина мен Ресейдің тікелей келіссөздер жүргізуі. Бұл бейбітшілікке қарай ілгерілеудің негізгі элементі», - деді ол.
