Жазылу
Ұлттық үйлестірушілер ШЫҰ саммитінің қорытынды құжаттарын алдын ала қарады
Астанада Шанхай ынтымақтастық ұйымына мүше мемлекеттері Ұлттық үйлестірушілер кеңесінің (ҰҮК) отырысы өтті.
Қаралған құжаттардың мазмұны әзірге жарияланбайды.
Ұлттық үйлестірушілер ШЫҰ Саммитінің қорытынды құжаттарын қарастырып, көпсалалы ынтымақтастықты одан әрі дамыту мәселелерін, сондай-ақ Қазақстанның ШЫҰ-ға төрағалығымен өтетін іс-шараларды дайындау мәселелерін талқылады, деп хабарлады CІМ.
Қазақстанның ШЫҰ мәселелері жөніндегі ұлттық үйлестірушісі Мұрат Мұқышев Қазақстанның ұйымға төрағалығы «аймақтағы өзара тиімді, сенімді және көп қырлы өзара іс-қимылды дамытуда үлкен жұмыс атқарғанын» айтты.
Айта кетейік, 2024 жылғы 3-4 шілдеде Астанада ШЫҰ-ға мүше мемлекеттер басшыларының кездесуін өткізумен Қазақстан ШЫҰ-ға төрағалығын аяқтайды. Тараптардың бірлескен күш-жігерімен Қазақстанның төрағалығымен ШЫҰ ынтымақтастығының барлық спектрі бойынша 150-ден астам іс-шара өткізілді.
ҰҮК Ұйымның ағымдағы қызметін үйлестіреді және ШЫҰ-ға мүше мемлекеттердің тиісті министрліктері мен ведомстволарының өзара іс-әрекетін жүзеге асырады.
