Мадридтiң “Реал” футбол клубы әлемдегi ең бай клубтардың көшiн бастап тұр. Мұндай ақпаратты “Deloitte” аудиторлық компаниясы жария­лады. Халықаралық аудиторлық компаниясы әлемдегi футбол клубтарының әмиянын ақтарып жүргенiне он үш жыл болды. Компания басшылары бай клубтардың жылдық кiрiсiн есептей келе Мадридтiң “Реа­лын” биыл алтыншы жыл қатарынан көш басына қойып отыр. Корольдiк клубтың же­ке қазынасына былтырғы жылы 400 миллион еуродан астам табыс кiрген. Екiншi орында – Испанияның тағы бiр клубы каталониялық “Барселона”. Чемпиондар лигасының былтырғы жылғы чемпионы 2009 жылы 365,9 миллион еуро пайда тапқан. 2008 жылдың қорытындысы бойынша ең көп табысқа кенелген командалардың арасында екiншi орында болған ағылшынның “Манчестер Юнайтедi” үшiншi орынға ығысыпты. Немiстiң “Бавария” клубы да “малтапқыштығы” жағынан ешкiмнен қалысар емес. Жылына 289,5 миллион еуро тапқан мюнхен­дiк клуб төртiншi орында тұр. Бiр қызығы, әлемнiң ең бай клубтарының алғашқы ондығына кiлең еуропалық командалар кiрген.