Германиядағы ауылдық мерекеде белгісіз адам пышақпен шабуыл жасап, сегіз адам жараланды
Германияның Эглинг елді мекенінде өткен Blauliachd ауылдық мерекесінде белгісіз адам пышақпен шабуыл жасап, оқиға орнынан қашып кеткен.
Қазір полиция күдіктіні іздестіріп жатыр. Оқиға салдарынан, шетел азаматтарын қоса алғанда, сегіз адам жарақат алды.
Белгісіз адам алдымен 24 жастағы Аустрия азаматы мен оның 16 жастағы танысына пышақпен шабуыл жасаған. Жарақаттардың бірі оң қолдың білек тұсындағы артерияға тиген. Кейін тағы бірнеше мереке қонағы жараланған.
Зардап шеккендердің кейбіріне сол түні шұғыл операция жасалды. Олардың арасында бет сүйектері сынған адамдар да бар.
Қауіпсіздік қызметі мереке аумағына кіретін және шығатын жолдарды жапқанына қарамастан, шабуыл жасаған адам қашып үлгерген. Полиция оның жеке басын және шабуылдың себебін анықтап жатыр.
Мерекеге шамамен 700 адам қатысқан. Құқық қорғау органдары тексеру жүргізгендіктен, олар ұзақ уақыт бойы аумақтан шыға алмаған. Тергеушілер күдікті полиция келгенге дейін фестивальден кетіп қалған болуы мүмкін деп есептейді.
Оқиға орнына 60-қа жуық полиция қызметкері, бес жедел жәрдем көлігі, екі дәрігер, құтқару тікұшағы мен полиция дроны жұмылдырылды. Сондай-ақ Эглингтің 15 өрт сөндіру қызметкері аумақты жарықтандыруға және жол қозғалысын реттеуге көмектесті.
Айта кетейік, 2026 жылдың ақпанында Германияда карнавал кезінде де бірнеше пышақпен шабуыл жасау оқиғасы тіркелген.