Қызылордада жалған ақпарат таратқан 22 жастағы қыз қамауға алынды
Қызылорда қаласының 22 жастағы тұрғыны Шұғыла Сәбит полиция қызметкерлерінің заңды талаптарына бағынбай, ұсақ бұзақылық жасағаны және жалған ақпарат таратқаны үшін жауапқа тартылды.
Полиция мәліметінше, қыз түнгі уақытта тыныштықты бұзып, әлеуметтік желіде шындыққа жанаспайтын ақпарат жариялаған. Сонымен қатар құқық қорғау қызметкерлеріне құрметсіздік танытып, олардың заңды талаптарына бағынбаған.
Сот шешімімен тұрғынға әкімшілік қамау жазасы тағайындалды. Бұдан бөлек, оған әкімшілік айыппұл салынып, ресми ескерту берілді.
Қабылданған шаралардан кейін қыз әлеуметтік желілердегі тиісті жазбаларын өшірген.
Бұған дейін Шұғыла Сәбит әлеуметтік желіде өзін «күлгені үшін жауапкершілікке тартты» деген ақпарат таратқан болатын. Полиция бұл мәліметтің шындыққа сәйкес келмейтінін мәлімдеді.