Жазылу
АҚШ Халықаралық даму агенттігі (USAID) ресми түрде жабылады – Марко Рубио
АҚШ Мемлекеттік хатшысы Марко Рубио Халықаралық даму агенттігі – USAID-тің ресми түрде жабылатынын мәлімдеді. Таратылу процесін Президент әкімшілігі жанындағы Әкімшілік-бюджет басқармасының директоры Рассел Воут қадағалайды.
Ресми мәлімдеме
– Қаңтардан бері біз салық төлеушілердің ондаған миллиард долларын үнемдедік. Енді USAID ресми жабылу алдында тұр. Агенттікті жабу процесіне жетекшілік етіп отырған Расселді құттықтаймын, – деді Рубио.
60 жылдық тарихы бар агенттік
USAID 60 жылдан астам уақыт бойы әлемнің көптеген елінде экономика, денсаулық сақтау, білім беру және гуманитарлық саладағы жобаларды қаржыландырып келген.
2025 жылдың наурыз айында Марко Рубио агенттік бағдарламаларының 83 пайызы жабылатынын хабарлаған болатын. Сол кезде-ақ Вашингтондағы бас кеңсе жабылды. АҚШ-тың жаңа әкімшілігі мұны қаржының тиімсіз жұмсалуы және сыртқы саясат басымдықтарын қайта қарау қажеттілігімен түсіндірген.
Трамптың шешімі
Осы жылдың шілде айында президент Дональд Трамп USAID бағдарламалары мен шетелге бөлінетін көмекті қысқарту жөніндегі заңға қол қойды. Бұл шешімге сәйкес, шетелдік көмекке бөлінген 9 миллиард доллар АҚШ бюджетіне қайтарылды.
Осылайша, ондаған жыл бойы әлем елдеріне қолдау көрсетіп келген USAID-тің тарихы ресми түрде аяқталмақ.
