«Ордабасы» футбол клубының экс-президенті қылмыстық жауапкершіліктен босатылды

Тергеу материалдарына сәйкес, Абдубаитов клуб президенті қызметін атқарған кезеңде футболшылармен директорлар кеңесінің келісімінсіз ірі көлемдегі келісімшарттарға қол қойған. Антикоррупциялық қызметтің нұсқасы бойынша, сыйақылар мен бонустардың шамадан тыс белгіленуі бюджет қаражатының негізсіз жұмсалуына әкеліп, жалпы шығын көлемі 2,3 млрд теңгені құраған.

Сонымен қатар тексеріс барысында клубтың Конференциялар лигасына қатысуына бөлінген 1,2 млрд теңгенің мақсатты түрде пайдаланылмағаны анықталған. Аталған қаражат ұйымдастыру шығындарына емес, салық берешектерін өтеуге және футболшыларға қосымша төлемдер төлеуге жұмсалған.

Осы деректер бойынша Антикоррупциялық қызмет лауазымдық өкілеттіктерді теріс пайдалану және бюджет қаражатын мақсатсыз жұмсау белгілерімен тағы бір қылмыстық іс қозғаған. Сөйтіп, тергеу бір мезетте Қылмыстық кодекстің екі бабы бойынша жүргізілген.

Қадағалаушы орган тергеудің басталғаны туралы жария мәлімдемеден кейін жеті ай өткен соң, Қазақстан Республикасының Бас прокуратурасы істің мәртебесіне қатысты ресми түсініктеме берді.

"Бұрынғы “Ордабасы” футбол клубының президенті Абдубаитов Б.-ға қатысты қылмыстық іс бойынша Шымкент қаласы бойынша Сыбайлас жемқорлыққа қарсы іс-қимыл агенттігінің департаменті сотқа дейінгі тергеп-тексеру жүргізді. Тергеу нәтижесінде іс немқұрайдылық дерегі бойынша  негіздермен тоқтатылды. Қабылданған шешіммен Шымкент қаласының прокуратурасы келісті. ҚР ҚПК-нің 201-бабына сәйкес, сотқа дейінгі тергеп-тексерудің өзге деректері жария етілмейді», - делінген Бас прокуратура жауабында.

Осылайша, Абдубаитовқа қатысты қылмыстық қудалау реабилитациясыз тоқтатылды. Яғни ол құқыққа қайшы әрекет жасағаны мойындалғанымен, қылмыстық жауапкершіліктен босатылып, жаза қолданылмайды.

Еске салайық, Бауыржан Абдубаитов 2022 жылғы ақпаннан 2024 жылғы мамырға дейін ФК «Ордабасы» президенті қызметін атқарды. Ол бұл лауазымнан денсаулық жағдайына байланысты кеткенін мәлімдеген еді.