Бишімбаев бұған дейін тағы бір қызды ұрып-соққан

Бұл Қуандық Бишімбаевтың әйелді қорлап, ұрған бірінші жағдай емес. Нүкеновтер отбасына тағы да бір бойжеткен байланысқа шығып, өзін Бишімбаевтың өлімші етіп сабағанын айтып берген. Ratel.kz жариялаған сұхбатта Салтанат Нүкенованың өліміне қатысты көп дерек айтылады.

– Тергеу туралы айту әлі ерте, бүгін-ертең Астанаға барамыз деп отырмыз. Қалалық ішкі істер басқармасының бастығы шақырып жатыр, тергеудің қалай, қай бағытта жүріп жатқанын түсіндіргісі келеді. Өлімнің алдын ала себебі жабық бассүйек-ми жарақаты деген сараптама бізді қатты алаңдатады. Ал бір блогер Салтанаттың басынан қатты жарақат алып, ұйықтап жатқанда қайтыс болғанын жазды.

Бишімбаевтар қанішерді ақтау үшін қорғаныс шебін құрып жатқанын түсінеміз. Бірақ қарындасымның денесін жууға әкелгенде, арнайы бардым, фото және видео түсірдік. Жарақаты көп еді. Бұл беттегі көгеру емес, бастағы ісіктер, бір көзі соққыдан ағып кеткен. Бишімбаев қарындасымды арнайы әдіспен өлтірген.

Қуандық оны бір жерге көмгісі келген немесе алып кетіп, жасырып, сол арқылы жауапкершіліктен құтылғысы келген шығар деп болжаймыз. Бұл адам құбыжық және салқын қанды кісі өлтіруші екені анық. Қарындасымның мәйіті жатқан жерде, ағасы екеуі үнсіз түскі ас ішіп, іздерін қалай жабу керегін талқылаған. Көрпе әкеліп, телефонды алып, бейнекамералардағы жазбаларды өшірген. Ағасы таңғы сағат 9.30-да келіп, кешкі сегізге дейін жедел жәрдем мен полиция шақырмаған

Басында 15 күнде медициналық сараптама дайын болады десе, жұрт шулаған соң 30 күнге созды, қазір 45 күн дейді. Осыған байланысты Әділет министріне сараптаманы бақылауға алуын сұраймыз.

– Қуандық есірткі қабылдады деген мәліметтер айтылады?

– Иә, біз де естідік, бірақ оның қанынан есірткі табылмады. Камералар оның түннен таңға дейін ішімдік ішкенін көрсетті, содан кейін оның 0,65 жеңіл дәрежедегі мастығы анықталды. Бұған таң қалдық.

– Жиеніңіздің отбасында бірдеңе дұрыс емесін бұрын байқамадыңыз ба?

– Жоқ. Бізге Қуандық жақсы отбасынан шыққандай көрінді. Анасы мен әкесі құрметті адамдар. Салтанат пен Қуандық үнемі Павлодарға айына бір рет келетін, інім мен келінім Астанаға барып көрісіп, құрбыларымен жақын араласатын, өткен аптада қонаққа барғанда бір-бірімен тату екендері көрінетін. Салтанат Қуандықтың балаларымен өте жылы қарым-қатынаста болды.

– Бишімбаев министр болып жұмыс істеген кезінде қарамағындағыларға дөрекі қылық көрсетіп, озбырлық танытқан дейді?

– Иә, мұны өзім де байқадым, ол кезде Ақсу қаласының әкімі болдым, бірнеше рет кездесулерге бардым. Ол қызметкерлердің жасына қарамайтын, дөрекілік танытатын. Бірақ бұл жұмыс, ал үй - үй. Дегенмен, ол айналасындағылардың барлығының оған бағынатынына үйренген шығар. Бәрі одан қорқатын сияқты. Бірақ әр нәрсенің шегі бар! Меніңше, Бишімбаевтың әйелді қорлауы бірінші рет емес. Бір қыз интернет арқылы бізге хабарласты, Қуандық оны қатты ұрып-соққан екен. Одан қашып, полицияға арыз жазғанда ақша арқылы бәрін сатып алғанын айтады. Ол тергеуге куәлік беруге дайын.

– Салтанат туралы айтып берсеңіз?

– Ол жарқын да көпшіл адам еді. Бүкіл отбасымызды жинағанды ​​жақсы көретін. Менің тоғыз ағам мен әпкем, 20-дан астам жиендерім бар. Ол біздің әрқашан жақын араласуымызды қалайтын. Арамызда көшбасшы болатын. Ешқашан артық ештеңе сұрамайды. Көлігі тоқтап қалды ма, басқаларды әурелеп жеткізіп тастауды сұрамайды, автобуспен жүре береді. Жеңгем жаназада бірнеше рет есінен танып қалды, ағам шыдап жүрді, бірақ ол да енді беріле бастады. Ағам өмірдегі көшбасшымыз, Желтоқсан оқиғасы үшін сотталған, кейін ақталған адам. Тағдырдың кез келген соққысына төтеп берді. Бірақ қызының өлімі аған да оңай соқпаған секілді.

Айта кетейік, 2023 жылдың 9 қарашасында бұрынғы Ұлттық экономика министрі Қуандық Бишімбаев әйелін ұрып өлтірді деген күдікпен ұсталды. Қайғылы оқиға елордадағы «Бау» мейрамханасында болған.