Қазақстандағы алғашқы АЭС құрылысы 2027 жылы басталуы мүмкін
Қазақстандағы алғашқы атом электр станциясының құрылысы 2027 жылы басталуы мүмкін. Бұл туралы Атом энергиясы агенттігінің ресми өкілі мәлімдеді.
Мәліметке сәйкес, Ресей президенті Владимир Путиннің Қазақстанға мемлекеттік сапары кезінде Қазақстан мен Ресей алғашқы АЭС жобасына қатысты екі үкіметаралық келісімге қол қоюы мүмкін.
Әңгіме атом станциясының құрылысы мен жобаның қаржылық тетіктеріне қатысты құжаттар туралы болып отыр.
Егер тараптар қажетті келісімдерге қол қойса, Қазақстандағы алғашқы АЭС жобасы дайындықтың келесі кезеңіне өтеді.
Еске салайық, 2025 жылдың ақпанында Қазақстанда алғашқы атом электр станциясының салынатын орны ресми түрде бекітілген болатын. Тиісті қаулыға премьер-министр Олжас Бектенов қол қойған.
Алғашқы АЭС Алматы облысы Жамбыл ауданында салынады. Бұл ауданда құрылыс алаңы ретінде аталған Үлкен ауылы орналасқан.
2024 жылдың қаңтарында президент Қасым-Жомарт Тоқаев үкімет пен Самұрық-Қазына қорына атом саласын дамытудың ұзақмерзімді жоспарын әзірлеуді тапсырған еді. Мемлекет басшысы болашақ АЭС-терге арналған орындарды таңдау кезінде қауіпсіз әрі заманауи технологияларға басымдық беру қажет екенін айтқан.
Сондай-ақ Тоқаев үкімет пен парламенттен екінші атом электр станциясын салатын орын бойынша ұсыныс күтетінін мәлімдеген.
Сол кезде энергетика министрі Алмасадам Сәтқалиев екінші АЭС алғашқы станциямен қатар салынуы мүмкін екенін жоққа шығармаған.
Оның айтуынша, екінші АЭС те Алматы облысының Жамбыл ауданында бой көтереді. Министр мұны елдің оңтүстігіндегі электр энергиясы тапшылығымен түсіндірген. Қазір бұл өңірге электр қуаты негізінен Қазақстанның солтүстігінен жеткізіледі.
Айта кетейік, 2025 жылдың шілдесінде Қазақстандағы екінші және үшінші атом электр станцияларын Қытай салатыны туралы хабарланған еді.
