Алматыда «Мемлекеттік қызмет туралы» жаңа Заңның негізгі ережелері түсіндірілді
Алматыда мемлекеттік басқару жүйесін жаңғыртуға бағытталған жаңа заңнамалық өзгерістерді түсіндіруге арналған кеңейтілген жиын өтті. Басқосуда 2026 жылғы 1 шілдеден бастап күшіне енетін «Мемлекеттік қызмет туралы» жаңа заңның негізгі ережелері талқыланды.
Жиынға қала әкімі Дархан Сатыбалды, Мемлекеттік қызмет істері агенттігінің төрағасы Дархан Жазықбай, аудан әкімдері, мемлекеттік органдардың басшылары және құқық қорғау құрылымдарының өкілдері қатысты.
Кездесуде мемлекеттік қызмет жүйесін жетілдіру, кадрлық саясатты жаңарту және мемлекеттік аппараттың тиімділігін арттыру мәселелері сөз болды. Қатысушылардың айтуынша, жаңа заң мемлекеттік басқарудағы ашықтық пен жауапкершілікті күшейтуге, азаматтарға көрсетілетін қызмет сапасын жақсартуға және кәсіби кадрларды мемлекеттік қызметке тартуға бағытталған.
Мемлекеттік қызмет саласындағы жаңашылдықтардың бірі – кадрларды іріктеу кезінде үміткердің тек мемлекеттік сектордағы емес, жеке және квазимемлекеттік сектордағы еңбек тәжірибесін де ескеру. Бұл тәсіл түрлі салаларда тәжірибе жинақтаған мамандардың мемлекеттік басқару жүйесіне келуіне мүмкіндік береді.
Жаңа заң мемлекеттік қызметті кәсібилендіруге, меритократия қағидаттарын нығайтуға және басқару шешімдерінің сапасын арттыруға басымдық береді. Сонымен қатар мемлекеттік органдар қызметінің сервистік сипатын күшейту көзделіп отыр. Яғни, мемлекеттік аппараттың басты мақсаты азаматтардың сұранысына жедел әрі сапалы жауап беру болуы тиіс.
Мемлекеттік қызмет істері агенттігінің мәліметінше, жаңартылған модель мемлекеттік басқарудағы заманауи кадрлық құралдарды енгізуге, кәсіби және білікті мамандар корпусын қалыптастыруға мүмкіндік береді. Бұл өз кезегінде мемлекеттік органдар қызметінің ашықтығын арттырып, қоғамның мемлекеттік институттарға деген сенімін күшейтуге ықпал етеді.
Кездесу барысында жаңа заң нормаларын тәжірибеде қолдану тетіктері де талқыланды. Сарапшылардың пікірінше, аталған өзгерістер мемлекеттік аппаратты бюрократиялық рәсімдерден арылтуға, шешім қабылдау үдерісін оңтайландыруға және азаматтарға бағдарланған басқару мәдениетін қалыптастыруға бағытталған.
Іс-шара соңында мемлекеттік қызмет саласының ардагерлері мен үздік мамандары марапатталып, олардың мемлекеттік басқару жүйесін дамытуға қосқан үлесі атап өтілді.
Осындай реформалар Алматы қаласында құқықтық мәдениетті дамытуға, мемлекеттік органдар жұмысының ашықтығын қамтамасыз етуге және азаматтардың мемлекеттік қызмет көрсету сапасына деген сенімін арттыруға негіз болады.
