Ақмола облысында куәгер ретінде жауап берген дәрігердің өлімі тергеліп жатыр
Ақмола облысының Есіл қаласында аудандық ауруханада терапевт болып жұмыс істеген 38 жастағы Екатерина Шлегельдің денесі үйінен табылды.
Оның өліміне байланысты полиция сотқа дейінгі тергеу жүргізіп жатыр.
Алдын ала мәлімет бойынша, әйел осы оқиғадан аз уақыт бұрын Көкшетауға барып, қылмыстық іс бойынша куәгер ретінде жауап берген. Тергеу әрекеттері кезінде одан ұялы телефоны алынғаны хабарланды. Үйіне оралғаннан кейін ол жұмысқа шықпаған. Әріптестері мен туыстары іздестіре бастағанда, әйелдің денесі өз үйінен табылған.
Ақпарат көздерінің хабарлауынша, оқиға орнынан анасына арналған қоштасу хаты да табылған. Онда "Сені сағынамын" деген сөздер жазылғаны айтылады.
Полиция әйелді өз-өзіне қол жұмсауға дейін жеткізу дерегі бойынша қылмыстық іс қозғаған. Алдын ала болжам бойынша, әйел өзіне қол жұмсаған. Алайда оның өлімі жауап алу немесе басқа тергеу әрекеттерімен байланысты ма, әзірге белгісіз.
Оқиғаның себептері мен мән-жайы анықталып жатыр.
