«Басында үлкен тесіктер болды»: Салтанат Нүкенованың ағасы қарындасының өліміне қатысты тың дерек айтты

Оның айтуынша, марқұмның жақындары тесікті мәйітті жуындырған кезде көрген. 

«Бұл туралы айту өте қиын. Бишімбаевтар отбасының қандай мүмкіндіктері бар екенін жақсы білеміз. Сол үшін суреттер өзімізде де болуы тиіс деп жуындыруға кірген кезде бүкіл денесін суретке түсіріп алдық. Бас аймағында үлкен тесіктер болды. Өз көзіммен көрдім. Денесінің барлық жері көгерген. Егер сот немесе тергеу экспертиза шешімімен келіспесе, онда біз осы фото-видеоларды ұсынамыз», - деді Қайрат Нүкенов.

Суреттерді желіге шықпауын қалаған жақындары, қылмыскердің өмір бойына бас бостандығынан айырылғанын қалайды. 

«Бұған дейін оған ауыр айып тағылып сотталды, бірақ кешірім берілді. Міне, екінші рет ауыр қылмыс жасап отыр. Демек, пайдасы тимеді деген сөз. Сол үшін құқық қорғау орындарынан өмір бойына бас бостандығынан айыруды сұраймын. Себебі мұндай адам бостандықта жүрмеуі керек. Бірнеше жылдан соң қайта бостандыққа шықса, тағы да ауыр қылмыстар жасауы мүмкін. Мұндай адам қоғам үшін қауіпті», - деді ол.