Иран АҚШ-ты бітімді бұзды деп айыптады

Тегерандағы Қарулы күштердің орталық штабы (Хатам әл-Анбия) бұл әрекетті «теңіз қарақшылығы» және «бітімді өрескел бұзу» деп атады.

Иран тарапының мәліметінше, осыдан кейін ел әскері АҚШ әскери кемелеріне қарсы дрондармен соққы жасаған.

Бұған дейін АҚШ президенті Трамп өзінің Truth Social әлеуметтік желісінде америкалық әскери-теңіз күштері Оман шығанағында иран жүк кемесін атқылап, қолға түсіргенін мәлімдеген. Оның айтуынша, кеме Вашингтон енгізген Ормуз бұғазы арқылы теңіз блокадасын айналып өтпек болған.

Бұл ақпаратты АҚШ-тың Орталық қолбасшылығы – CENTCOM да растады.

Келіссөздерге қауіп төнді

Tasnim News Agency хабарлауынша, Иран Ормуз бұғазындағы блокада жалғасып жатқан жағдайда АҚШ-пен келіссөздерге қатысудан бас тартуы мүмкін.

Сарапшылардың пікірінше, бұл оқиға Тегеран мен Вашингтон арасындағы жағдайды одан әрі ушықтырып, жаңа келіссөздердің өтуін белгісіз күйге түсіріп отыр.