Енді қазақстандықтар жол-көлік оқиғасын полиция мен соттың қатысуынсыз тіркей алады

Қазақстанның Ішкі істер министрлігі жеңіл жол-көлік оқиғаларын олардың қатысушылары полиция мен соттың қатысуынсыз өз бетінше арнайы жүйеге тіркей алатынын еске салды.

Бұл тек осы жағдайларда жүзеге асады: 

Жол-көлік оқиғасына екі көлік қана қатысса;
Жүргізушілердің жарамды сақтандыруы болуы керек;
Кінәлі мен жәбірленушінің кім екендігі туралы келіспеушіліктердің болмауы;
Зардап шеккендер жоқ болса;
Автокөлікке келтірілген залал мөлшері 100 АЕК-тен (369 мың теңге) аспау қажет; 

Осы шарттардың барлығы орындалса, ЖКО қатысушылары апат фактісін тіркеп, Europrotocol мобильді қосымшасы арқылы сақтандыру компанияларына материалдық шығынды өтеу туралы өтініш бере алады. Ведомство мұндай тіркеу кезінде жүргізушілер әкімшілік жауапкершілікке тартылмайтынын атап өтті. Сонымен қатар сақтандыру мерзімдері де қысқартылды. 

«Егер бұрын хаттама жасалған сәттен бастап сақтандыру төлемдерін алғанға дейін 30 күннен 90 күнге дейін уақыт алуы мүмкін болса, енді сақтандыру төлемін алуға небәрі бес күн ғана уақыт кетеді», - деп түсіндірді министрлік.

Айта кетерлігі, әлемдік тәжірибеде жол-көлік оқиғаларын тіркеудің оңайлатылған тәртібі 10 жылдан астам уақыт бойы қолданылып келеді. Бастамашылар Еуропа елдерінің сақтандырушылары болды. Бұл ретте олар қайшылықтар анықталған жағдайда тәуелсіз сараптама тағайындау құқығын өзіне қалдырды.

Бас прокуратураның мәліметінше, 2023 жылы Қазақстанда 10 мыңнан астам жол-көлік оқиғасы болған. 14 мыңнан астам адам жарақат алып, 1,6 мыңнан астам адам қаза тапты. Ішкі істер министрлігі еліміздегі жол-көлік оқиғаларының басты себебі жолдардың сапасыздығы екенін мәлімдеді.