Краковта алты адамды атып өлтірген күдікті ауруханада көз жұмды

Польшаның Краков қаласында жаппай атыс ұйымдастырды деген күдікке ілінген 24 жастағы ер адам ауруханада қайтыс болды. Бұл туралы 9 қарашада жергілікті полиция хабарлады.

Малопольск воеводствосы полициясының мәліметінше, күдікті 7 қарашада полиция қызметкерлерімен атыс кезінде ауыр жарақат алған. Ол ауруханаға жеткізіліп, дәрігерлердің бақылауында болған. Алайда 9 қараша күні таңертең оның көз жұмғаны белгілі болды.

Еске салайық, 7 қарашада Краков қаласының орталық алаңында қарулы шабуыл жасалған. Алдын ала мәлімет бойынша, 24 жастағы Польша азаматы көлікпен келіп, адамдарға оқ жаудырған.

Шабуыл салдарынан алты адам қаза тауып, кемінде 16 адам жарақат алған. Қаза тапқандар арасында Ұлыбритания мен Австрия азаматтары да бар. Зардап шеккендердің қатарында екі полиция қызметкері болған.

Оқиға орнынан қашуға әрекеттенген күдікті полициямен атысқа түсіп, ауыр жараланған. Кейін ол ұсталып, ауруханаға жеткізілген.

Тергеу барысында күдіктінің үйінен тағы үш адамның мәйіті табылған. Алдын ала мәлімет бойынша, олар оның әкесі, анасы және қарындасы. Құқық қорғау органдары бұл өлімдердің Краковтағы шабуылмен байланысын анықтап жатыр.

Польша прокуратурасы оқиғаны терроризмге қатысты қылмыс ретінде тергеп жатыр. Әзірге күдіктінің мұндай әрекетке баруына не себеп болғаны толық анықталған жоқ.

Қайғылы оқиғаға байланысты Польшада 8 және 9 қараша күндері ұлттық аза тұту жарияланған болатын.

Күдіктінің қайтыс болғанына қарамастан, құқық қорғау органдары шабуылдың мән-жайын және оған басқа адамдардың қатысы бар-жоғын анықтау жұмыстарын жалғастырып жатыр.