Нұрлан Сабуровтың Ресейге кіруіне салынған тыйымды 100 млн рубльге алып тастамақ болған

Қазақстандық әзілкеш Нұрлан Сабуровтың өкілдеріне белгісіз адамдар Ресейге кіруге салынған 50 жылдық тыйымды алып тастап беруді ұсынған. Олар бұл мәселені 100 млн рубльге шешуге көмектесетін байланыстары бар екенін айтқан.

Ресейлік БАҚ мәліметінше, Сабуровтың менеджеріне бұрын күш құрылымында жұмыс істеген адам мен оның сыбайласы хабарласқан. Алайда менеджер бұл ұсыныс туралы құқық қорғау органдарына хабар берген. Қазан айының ортасында күдіктілер ақшаның алғашқы бөлігін алу кезінде ұсталған.

Сабуров тергеуге көмектесуге дайын

БАҚ дерегінше, әзілкеш тергеу органдарына куәлік беру үшін Ресейге баруға дайын екенін мәлімдеген. Қазір күдіктілерге қатысты тергеу жүріп жатыр.

Еске салайық, 2026 жылдың қаңтарында Нұрлан Сабуровқа Ресейге 50 жыл бойы кіруге тыйым салынған. Бұған дейін оның қызметіне қатысты Қазақстанның Ұлттық қауіпсіздік комитеті де тексеру жүргізген еді.