Павлодар облысында кейуананы зорлап, өлтіріп кеткен ер адам 14 жылдан кейін ұсталды
Павлодар облысында 14 жыл бұрын жасалған кісі өлтіру ісі ашылды. 2012 жылы Павлодар қаласындағы саяжай алқаптарының бірінің аумағынан зорлықпен қаза болған белгілері бар егде жастағы әйелдің мәйіті табылған.
Қылмыстық іс ұзақ уақыт бойы ашылмаған қылмыстар қатарында болды. Алайда адам өлтіруге қатысы бар тұлғаны анықтау бойынша жұмыс тоқтатылған жоқ. Прокурорлардың және тұрақты жұмыс істейтін жедел-тергеу тобының жүргізген жұмысының, сондай-ақ криминалистикалық зерттеудің заманауи әдістерін қолданудың нәтижесінде қылмысты жасауға қатысы бар тұлға анықталды.
Күдікті – Павлодар облысы Успен ауданының 62 жастағы тумасы. Прокуратураның нұсқауы бойынша жүргізілген сот сараптамаларының кешені, сондай-ақ тергеу және жедел-іздестіру іс-шараларының нәтижесінде қажетті дәлелдемелер жиналды.
Қылмыстық іс сотқа жолданды. Сотталушының әрекеттеріне түпкілікті құқықтық бағаны сот береді.
