Павлодарлық блогер пауэрбанк жарылысынан күйік шалып, ауруханаға түсті
Павлодарда фитнес-клубтағы әдеттегі жаттығу жергілікті блогер Диляра үшін қайғылы жағдайға айнала жаздады.
Оның сөмкесіндегі пауэрбанк жарылып, қыз ауыр күйік алды. Бұл туралы «Криминальный Казахстан» басылымы хабарлады.
Диляраның айтуынша, оқиға ол жаттығудан кейін үйіне қайтуға жиналып жатқан сәтте болған.
Кенеттен оның сөмкесінен қою түтін шыға бастаған. Блогер мұны бірден байқамаған. Ал түтіндеп жатқан сөмкені иығынан шешпек болған кезде қатты жарылыс болған.
Жарылыстан кейін жалын бірден қыздың үстіне тараған. Куәгерлердің сөзінше, от жәбірленушіні әп-сәтте шарпыған.
Фитнес-клуб қызметкерлері мен келушілері дереу көмекке ұмтылып, өртті қолда бар құралдармен сөндіруге тырысқан. Алайда жанып жатқан киімді толықтай тек сыртқа шығарғаннан кейін ғана өшіре алған.
Зардап шеккен қыз жедел түрде қалалық ауруханаға жеткізілді.
Дәрігерлер оның қолы мен басынан ауыр термиялық күйік алғанын анықтаған.
Қазіргі уақытта мамандар блогердің жағдайын ауыр деп бағалап отыр.
