Петропавлда борышкерлерді суицидке дейін жеткізген өсімқорға үкім шықты

Ол заңсыз микроқаржылық қызметпен айналысу, озбырлық және алаяқтық жасағаны үшін кінәлі деп танылды.

Сот анықтағандай, бұрынғы боксшы 2013 жылдан бері іс жүзінде астыртын «банк» ұстап, азаматтар мен кәсіпкерлерге жылдық 120 пайызбен ірі көлемде қарыз ақша беріп отырған.

Өсімқордың құрбаны болған 43 борышкердің пәтері, үйі, коммерциялық жылжымайтын мүлкі мен автокөліктері кепілге алынған.

Қарыз беру схемасы және қайғылы салдары

Мәмілелер үш түрлі жолмен рәсімделген: нақты пайыздық мөлшерлемесі көрсетілмеген нотариалдық келісімшарт арқылы, мүлікті жалған сатып алу-сату мәмілесімен немесе қолхат жаздыру жолымен.

Кейін Абулгазиев салық органдарынан ақша айналымының нақты көлемін жасыру үшін өзінің танысы Владимир Рогановты да осы схемаға тартқан.

Зардап шеккендердің арасында кәсіпкерлер де, туыстарын шұғыл емдету үшін ақша алуға мәжбүр болған қарапайым тұрғындар да бар.

Борышкерлердің бірі – кезінде қалаға танымал болған «Блюз» мейрамханасының иесі О. Попов үшін Абулгазиевтен алған қарыз қайғылы жағдаймен аяқталған.

Ер адам қарызын тұрақты төлеп отырғанымен, берген ақшасының барлығы тек пайызын өтеуге кетіп, негізгі қарыз көлемі азаймаған.

2017 жылдың мамырында қарызды қайтаруды талап еткен тұрақты қоқан-лоқыдан кейін кәсіпкер өзіне қол жұмсаған. Соған қарамастан, кейін өсімқор оның мұрагерлерінен жылжымайтын мүлікті сот арқылы өндіріп алған.

Тағы бір борышкерді Абулгазиев қосалқы бөлмеде күштеп ұстап, оған психологиялық және физикалық қысым көрсеткен. Сондай-ақ мүлкін қайта рәсімдеуді талап еткен.

1,9 млрд теңгенің мүлкі тәркіленді

Бастапқыда сот 59 жастағы айыпталушыға 3 жыл 6 ай бас бостандығынан айыру жазасын тағайындады.

Алайда рақымшылық қолданылып, тергеу изоляторында өткізген уақытының бір күні бір жарым күнге есептелуіне байланысты түпкілікті жаза мерзімі 2 жыл 7 ай 15 күнді құрады.

Сонымен қатар оған 10 жыл бойы кәсіпкерлік және микроқаржылық қызметпен айналысуға тыйым салынды.

Сот шешімінің ең резонансты бөлігі – мемлекет кірісіне 1,9 млрд теңгеге жуық мүлік пен активтің тәркіленуі.

Оның ішінде:

• ақша қаражаты: 126,1 млн теңге, 396,9 мың доллар және 5 мың рубль;

• жылжымайтын мүлік пен көлік: екі үй, үш пәтер, екі жер телімі және үш автокөлік. Олардың жалпы құны – 227 млн теңге.

Абулгазиевтің ресми табысы оның иелігіндегі мүлік құнына сәйкес келмеген. Тек 2019–2025 жылдар аралығында оның есепшоттарына 873 млн теңгеден астам қаражат түскен.

Үкім әзірге заңды күшіне енген жоқ.