Путин Рамзан Қадыровтың отставкаға кетуіне рұқсат бермеді

Протоколдан тыс әңгіме және интернеттегі қауесеттерге жауап

Кездесу барысында Қадыров аймақтың экономикалық жетістіктерін, өндіріс пен құрылыс қарқынының артуын, жұмыссыздық деңгейінің төмендеуін баяндады. Дегенмен, ол баяндамасын түгелімен қағаздан оқып шықты, ал бақылаушылар оның қолының дірілдегеніне назар аударды.

Кейінірек Рамзан Қадыров кездесуде «протоколдан тыс» маңызды мәселелер қозғалғанын, Путиннен толық түсіністік пен қолдау алғанын хабарлады.

«Президент интернеттегі соңғы әңгімелерге де пікір білдіріп, Марк Твеннің әйгілі сөзін келтірді: “Менің өлімім туралы қауесеттер қатты әсіреленген” деді. Жұмыс жалғасуы тиіс екенін айтты. Жоғарғы Бас Қолбасшының бұйрығын орындаймын!» — деп жазды Қадыров.

Денсаулығына қатысты мәліметтер және мұрагерлік жоспары

Бұған дейін «Новая газета. Европа» басылымы Қадыровтың денсаулығы күрт нашарлағанын хабарлаған болатын. Басылым деректеріне сүйенсек, ол соңғы кездері Шешенстаннан шықпай, Грозный қаласындағы «Аймед» клиникасына жиі барып жүрген. 2019 жылы оған ұйқыбез некрозы диагнозы қойылған.

2025 жылғы медициналық тексеруден кейін Қадыров билікті отбасы мүшелеріне тапсыру процесін бастағаны туралы да ақпарат тарады. Аймақтағы бизнес активтер қайта тіркеліп, бұрын үшінші тұлғалардың атына жазылған мүліктер енді шынайы иелеріне — Қадыров отбасының мүшелеріне қайтарылған. Алайда, оның қыздары мемлекеттік қызметтен кетуге мәжбүр болғаны айтылды.

Қазіргі таңда Қадыров өзінен кейінгі мұрагер ретінде үшінші ұлы Адам Қадыровты қарастырып отырғаны хабарланды. Ол биыл қарашада 18 жасқа толады. Соңғы жылдары Адам түрлі мемлекеттік марапаттарға ие болып, жауапты лауазымдарға тағайындалып жүр.

Қадыровтың бірнеше мәрте отставка туралы айтуы

Рамзан Қадыров 2007 жылдан бері Шешенстанды басқарып келеді. «Кавказский узел» порталының мәліметінше, ол осы уақыт аралығында кемінде сегіз рет отставкаға кету ниетін білдірген. Атап айтқанда, 2017, 2020 және 2022 жылдары да қызметтен кетуге дайын екенін мәлімдеген.