Путинді сынаған блогер Ремесло психиатриялық ауруханадан шықты
Ресейде билікке жақын блогер Илья Ремесло психиатриялық ауруханадан шықты. Ол бұған дейін РФ президенті Владимир Путинді және Украинадағы соғысты сынаған еді.
Блогердің айтуынша, ол Санкт-Петербургтегі Скворцов-Степанов атындағы №3 психиатриялық ауруханада 30 күн болған.
«Мемлекеттің жоғары лауазымды тұлғаларын қатаң сынаудың өз бағасы бар – соны ұмытпаңыздар», – деп жазды Ремесло.
Оның сөзінше, ауруханадағы жағдай «айтарлықтай ауыр» болған, тіпті кейбір тұстары колониямен салыстырғанда да қиын көрінген. Атап айтқанда, серуендеуге шығу мүмкіндігі болмаған.
Ремеслоны ауруханаға жеткізген медицина қызметкерлері оған «сынның шегін сақтау қажеттігін» және оның жазбалары қоғамда «үлкен резонанс тудырғанын» айтқан. Бұл ретте олар журналист Ксения Собчактың атын да атаған.
Сонымен қатар, блогер жасаған әрекеттеріне өкінбейтінін айтты. Дегенмен алдағы уақытта «жеке басқа өтпей, неғұрлым салмақты әрі теңгерімді тұжырымдар қолданатынын» жеткізді.
Ремесло сондай-ақ алдағы 2–3 күн ішінде бұл әрекетінің себептерін және болашақ жоспарларын жариялауға уәде берді.
