Ресейлік сарапшылар Президенттің Қазақстан халқына жолдауын талқылады

Отырысты ашқан Қазақстанның Ресейдегі Елшісі Дәурен Абаев Жолдауда айтылған тезистер өте маңызды екенін атап өтті. Тұтас салаларда елеулі өзгерістер болып жатыр, соған орй, экономиканы монополиясыздандыру, үкіметаралық қатынастар, жергілікті өзін-өзі басқаруды дамыту, су тапшылығы мәселесін шешу және тағы басқалар сияқты маңызды салаларға мемлекеттік көзқарас та өзгереді.

Ресей Ғылым академиясының Е.М.Примаков атындағы Әлемдік экономика және халықаралық қатынастар институты директорының ғылыми жұмыстар жөніндегі орынбасары Сергей Афонцев Жолдаудың үш ережесіне оң баға берді. «Біріншіден, Қазақстан ұзақ мерзімді уақытша мақсаттар қоюдан бас тартуда. Екіншіден, тауар ағындары бағыттарының өзгеруіне және серіктестермен қатынасқа байланысты ел жаңа экономикалық аумақтарға уақтылы ден қояды. Үшіншіден, өңдеу өнеркәсібін дамытуға баса мән берілуде. Егер біз сарапшы ретінде өзара әрекеттесуді жалғастыратын болсақ, онда ұсыныстар мен іскерлік шешімдер тұрғысынан өте қызықты нәрселер көп болуы мүмкін», – деді ғалым.

Ресей халық шаруашылығы және мемлекеттік қызмет академиясының проректоры Андрей Марголин ұзақ мерзімді мақсаттардан бас тарту туралы тезиспен келісті, өйткені оларға қаражат пен көлемді ресурстар жұмсалады. Ол Жолдауда көтерілген энергетикалық қауіпсіздік, су ресурстарының қолжетімділігі мен сапасы, әлеуметтік жауапты қаржыландыруды дамыту мәселелерін дұрыс деп атады. Сарапшы үдемелі салық салуды енгізуді жеделдету жөніндегі Жолдауда айтылған тапсырманы да қолдады. Оның ойынша, мұндай қадамға барудың алғышарттары бүгінде пісіп жетілді және қоғамда ынтымақ болуы керек деген сауалдың қойылуының өзі орынды болды.

«Экономика Жоғары Мектебі» Ұлттық Зерттеу университетінің Кірістер мен өмір сүру деңгейін талдау орталығының бас ғылыми қызметкері Наталья Зубаревич өңірлердің біркелкі дамуының салдарынан фискалдық орталықсыздандыру бағыты дұрыс деп санайды. Ол сондай-ақ ең төменгі жалақыны көтеру бойынша іс-әрекеттерге жоғары баға берді, себебі соңғы үш жыл ішінде оның мөлшері екі есеге өсті. "Қазақстанда қазір ерекше жағдай бар: экономиканың өсуі бала туудың өсуімен қатар жүреді. Бұл қуатты серпіліс үшін тарихи мүмкіндік", – деп атап өтті сарапшы.

Ресей Федерациясы Үкіметі жанындағы Қаржы университетінің Халықаралық экономикалық қатынастарды зерттеу институтының директоры Виктория Перская Жолдаудан бәсекелестік артықшылықтарды тиімді пайдалануға негізделген Қазақстан экономикасын дамытудың жаңа моделін көрді. "Қазіргі кезеңде елдің берік индустриялық негізін қалыптастыру және экономикалық өзін-өзі қамтамасыз ету ең маңызды міндет болып табылады. Мемлекет өзін халықаралық қатынастардың мазмұндық субъектісі ретінде көрсетеді және өзінің ұлттық мүдделеріне сәйкес экономикалық өзара іс-қимылды қалыптастырады", – деді ғалым.

«Петербургская политика» қорының президенті Михаил Виноградов мұндай құжаттардан проблемалар мен қиындықтарға, ықтимал болашаққа және құралдарға баса назар аудару сияқты үш нәрсені күтетінін мойындады. Оның ойынша, Президенттің Қазақстан халқына Жолдауында осы құралдарға баса назар аударылған.

Дөңгелек үстелді қорытындылай келе, оған қатысушылар Жолдауда қойылған міндеттердің сәтті жүзеге асатынына сенім білдірді. Сарапшылардың пікірінше, экономика мен әлеуметтік саланы дамыту шаралары қазіргі күрделі геосаяси жағдайларда азаматтардың өмір сүру сапасын және әлеуметтік әл-ауқатының өсуін қамтамасыз етуге мүмкіндік береді. Сонымен бірге, сарапшылар өткен Жолдаулардағы тапсырмаларды іске асыру нәтижелерін қорытындылауға ниет білдірді. Бұл бағдарламалық құжаттың мәртебесін көтеруге ықпал етіп, бұл нөлден пайда болатын жыл сайынғы өнім емес, бақыланатын және жыл сайын жаңа басымдықтармен ауыстырылмайтын басқару және басымдық беру жүйесі екенін көрсетеді.