Ресейдегі ірі мұнай торабына дрондар қайта шабуыл жасады

 Нысан аумағында өрт шыққаны хабарланды.

Шабуыл Самара облысының Просвет елді мекені маңында орналасқан "Транснефть" компаниясының желілік өндірістік-диспетчерлік станциясына бағытталған.

Жергілікті тұрғындар жарылыс дыбыстарын естіп, мұнай нысаны орналасқан аумақтан қою қара түтін көтерілгенін хабарлаған. Astra басылымының OSINT-талдаушылары оқиға орнынан түсірілген фотосуреттерді тексеріп, түтіннің аталған станция маңынан шыққанын анықтаған.

The Insider басылымы NASA FIRMS спутниктік жүйесінің деректеріне сүйеніп, станция аумағында өрт болғанын растады.

Самара облысының губернаторы Вячеслав Федорищев өңірге украиналық дрондар шабуыл жасағанын хабарлады. Оның айтуынша, әуе шабуылына қарсы қорғаныс жүйелері мен мобильді атыс топтары жұмыс істеген.

Алайда Ресей билігі дәл осы мұнай станциясының зақымданғанын ресми түрде растаған жоқ.

Еуропадағы ең ірі мұнай сақтау кешендерінің бірі

"Самара" станциясы – Ресейдің мұнай құбырлары жүйесіндегі стратегиялық маңызы бар ірі өндірістік торап.

Нысанның аумағы 216 гектардан асады. Онда жалпы сыйымдылығы 1,6 миллион текше метрден асатын 71 мұнай резервуары орналасқан.

Станция Батыс Сібірден, Татарстаннан, Орынбор облысынан және Қазақстаннан келетін мұнайды қабылдап, сақтауға, араластыруға және магистральдық құбырлар арқылы тасымалдауға арналған.

Қазан айында да бірнеше рет шабуыл жасалған

Бұл – "Самара" мұнай торабына жасалған алғашқы шабуыл емес.

Бұған дейін, 2, 7, 10 және 11 қазанда аталған нысанға дрондар шабуыл жасағаны хабарланған.

Украина Қарулы күштері Бас штабының мәліметінше, 2 қазандағы шабуыл салдарынан бірнеше мұнай резервуары, құбыр учаскесі және мұнай өнімдерін құю инфрақұрылымы зақымданған.

Ал 7 қазандағы шабуылдан кейін станция аумағында ауқымды өрт шыққаны хабарланған.

Ресей Қорғаныс министрлігі 2 қарашаға қараған түні елдің бірнеше өңірінде, аннексияланған Қырымда және Қара теңіз бен Азов теңізі үстінде барлығы 212 украиналық дрон атып түсірілгенін мәлімдеді.

Қазіргі шабуылдан кейін мұнай станциясының жұмысы қаншалықты бұзылғаны және нақты қандай нысандар зақымданғаны белгісіз.