"Самұрық-Қазына" мен ҚТЖ-ның тағы үш басшысы ұсталды деген ақпарат тарады

Бұл туралы саясаттанушы Ербол Еділов өзінің Telegram-арнасында хабарлады.

Еділовтің дереккөздеріне сүйеніп жазуынша, 10 қарашада құқық қорғау органдары үш лауазымды тұлғаны қылмыс жасады деген күдікпен ұстаған болуы мүмкін.

Олар:

• Владимир Петров – "Қазақстан темір жолы" ұлттық компаниясының басқарушы директоры, "Тасымалдау процесінің дирекциясы" филиалының директоры;

• Азамат Сембай – "Самұрық-Қазына" қорының сатып алу әдіснамасы, бақылау және мониторинг департаментінің директоры;

• Қайрат Қабылов – "ҚТЖ – Жүк тасымалы" ЖШС бас директорының қамтамасыз ету жөніндегі орынбасары.

Саясаттанушы бұл мәліметтердің дереккөздерден алынғанын, ал болжамды ұстаулардың нақты себептері мен мән-жайы әлі анықталып жатқанын атап өткен.

Әзірге аталған үш қызметкердің ұсталғаны туралы ресми растау жарияланған жоқ.

ҰҚК екі ұлттық компания басшысының ұсталғанын растады

Бұған дейін, 12 қарашада Ұлттық қауіпсіздік комитеті "Самұрық-Қазына" қорының басқарма төрағасы Нұрлан Жақыпов пен "Қазақстан темір жолы" ұлттық компаниясының басқарма төрағасы Елжас Отыншиевтің ұсталғанын ресми растаған.

Ведомство мәліметінше, олар 11 қарашада ҰҚК Сыбайлас жемқорлыққа қарсы іс-қимыл қызметінің операциясы барысында ұсталған.

Екі басшы және өзге де адамдар сыбайлас жемқорлық қылмысын жасады деген күдікке ілінген.

Қазіргі уақытта қылмыстық істің барлық мән-жайын анықтауға бағытталған тергеу әрекеттері жүргізіліп жатыр.

ҰҚК Қылмыстық-процестік кодекстің 201-бабына сәйкес сотқа дейінгі тергеп-тексерудің өзге мәліметтері жарияланбайтынын хабарлады.

Қандай қылмыс бойынша күдікке ілінгені белгісіз

ҰҚК ресми хабарламасында күдіктілерге қатысты Қылмыстық кодекстің нақты баптары, ықтимал жемқорлық әрекетінің сипаты және қылмыстық істегі ақша сомасы көрсетілмеген.

Сондай-ақ Ербол Еділов атаған үш қызметкердің ҰҚК мәлімдемесіндегі "өзге адамдардың" қатарында бар-жоғы белгісіз.

Осылайша, ұлттық қор мен теміржол компаниясының басшыларына қатысты қылмыстық іс аясында тағы кімдердің жауапқа тартылып жатқаны әзірге толық анықталған жоқ.

Еске салайық, бұған дейін журналист Михаил Козачков Нұрлан Жақыпов пен Елжас Отыншиевке қатысты тергеу әрекеттері жүргізіліп жатқанын хабарлаған болатын.

Нұрлан Жақыпов кім?

Нұрлан Жақыпов 1978 жылы туған. Мәскеу мемлекеттік халықаралық қатынастар институтын бітірген. Еңбек жолында Credit Suisse, UBS, Rothschild & Co секілді халықаралық қаржы ұйымдарында жұмыс істеген. "Қазатомөнеркәсіп", "Тау-Кен Самұрық" және KIDF құрылымдарында басшылық қызметтер атқарған. 2023 жылғы сәуірде "Самұрық-Қазына" қорының басқарма төрағасы болып тағайындалды. Сонымен қатар Air Astana, "ҚазМұнайГаз" және KEGOC компанияларының директорлар кеңестерін басқарған.

Елжас Отыншиев кім?

Елжас Отыншиев 1987 жылы туған. Мәскеу физика-техникалық институтын бітірген. Еңбек жолын Ernst & Young компаниясында бастаған. Кейін "Тау-Кен Самұрық", KIDF және "Самұрық-Қазына" қорында түрлі басшылық қызметтер атқарған. 2023 жылдан бастап қордың стратегия және активтерді басқару бағытына жетекшілік етті. 2026 жылғы 20 шілдеде "Қазақстан темір жолы" ұлттық компаниясының басқарма төрағасы болып тағайындалды.