Си Цзиньпин мен Дональд Трамп Ормуз бұғазына қатысты мәселені талқылады
Бейжіңде өткен кездесуде Қытай төрағасы Си Цзиньпин мен АҚШ президенті Дональд Трамп Ормуз бұғазы төңірегіндегі жағдайды және Таяу Шығыстағы геосаяси ахуалды талқылады.
Ақ үй мәліметінше, келіссөздердің алғашқы күні «оң және нәтижелі» өткен. Кездесуде басты назар Иран төңірегіндегі шиеленіс пен оның жаһандық энергетикалық қауіпсіздікке әсеріне аударылған.
БАҚ дерегіне сәйкес, Қытай Иран мұнайының негізгі сатып алушыларының бірі болып саналады. Осыған байланысты Дональд Трамп Қытай басшысын Тегеранға ықпал етіп, Ормуз бұғазы арқылы мұнай тасымалының тұрақтылығын сақтауға шақырған.
Ақ үй өкілдері екі тарап Ормуз бұғазының ашық болуын және энергия ресурстарының еркін қозғалысын қамтамасыз ету қажет деген ортақ ұстанымға келгенін мәлімдеді.
Ақ үйдің мәліметінше, Қытай төрағасы Си Цзиньпин Бейжіңнің Ормуз бұғазын әскери мақсатта пайдалануға және оны қолданғаны үшін қандай да бір төлем енгізу әрекеттеріне қарсы екенін нақты жеткізді. Сонымен қатар, ол Қытайдың алдағы уақытта АҚШ-тан мұнай импортын ұлғайтуға мүдделі екенін білдірді. Бұл қадам елдің Ормуз бұғазы арқылы өтетін жеткізілімдерге тәуелділігін азайтуға бағытталған.
Алайда Қытайдың Таяу Шығыстағы қақтығысты реттеуге тікелей араласуға келісім бергені жөнінде әзірге ресми нақты ақпарат жарияланған жоқ.
