СҚО-да егістік алқабында механизатор химикаттан уланып көз жұмды
Солтүстік Қазақстан облысының Тимирязев ауданында өндірістегі жазатайым оқиға салдарынан бір адам қаза тапты.
Halyqstan телеграм арнасының хабарлауынша, «Қазақстан Бидайы» ЖШС-нің 46 жастағы механизаторы егістік алқаптарына дәрі шашу кезінде уланып, көз жұмған.
Алдын ала комиссия қорытындысына сәйкес, ер адамның өліміне пестицидтерден болған жедел токсикалық улану себеп болған.
Оқиға Ленин ауылдық округінің егістік алқаптарында болған.
Таңертең механизатор жоспарлы түрде егістікті химиялық өңдеу жұмыстарына кіріскен. Түн ортасына қарай кезекті агрохимикат құйылған ыдысты толтыру кезінде ол кенеттен есінен танып қалған.
Еңбек инспекциясының мәліметінше, әріптестері зардап шеккен азаматты дереу көлікке отырғызып, аудандық ауруханаға жеткізуге тырысқан. Алайда ер адам жолда қайтыс болған.
Тергеу басталды
Қазір оқиғаның мән-жайын Мемлекеттік еңбек инспекциясы комитетінің өңірлік департаменті анықтап жатыр.
Арнайы комиссия кәсіпорында еңбек қауіпсіздігі талаптарының сақталған-сақталмағанын, сондай-ақ жұмысшылардың жеке қорғаныс құралдарымен (маска, респиратор, арнайы киім) толық қамтамасыз етілгенін тексереді.
Кәсіпорын туралы не белгілі?
«Қазақстан Бидайы» ЖШС өңірдегі ірі агроөнеркәсіптік кәсіпорындардың бірі саналады.
Компания астық дақылдарын өсірумен, тұқым шаруашылығымен және мал шаруашылығын дамытумен айналысады.
Өткен жылы серіктестік мемлекеттік бюджетке 100 миллион теңгеден астам салық төлеген.
Қазіргі уақытта кәсіпорын өндіріс ауқымын кеңейтіп жатыр. Толық циклді жоғары технологиялық жарма зауытын салу және іске қосу жобасына 3 миллиард теңгеден астам инвестиция құйылған.
