Жазылу
Уақыт белдеуін ауыстыруға қатысты петиция бойынша қоғамдық талқылау өтті
Астанада 2024 жылдың 2 тамызында «Уақытты кері қайтару» петициясын қарау үшін құрылған жұмыс тобының қорытынды отырысы өтті. Қоғамдық талқылау сауда вице-министрі Қайрат Балықбаевтың төрағалығымен өтті. Жиынға қоғам өкілдері, петиция авторлары, сарапшылар, сондай-ақ денсаулық сақтау, энергетика, ауыл шаруашылығы, көлік, төтенше жағдайлар, еңбек және әлеуметтік қорғау, сауда және интеграция министрліктерінің қызметкерлері қатысты.
Жұмыс тобының 21 маусымда өткен бірінші отырысында 50 мың дауыс жинаған бастамашы топ екі негізгі себепті алға тартты Онда халықтың денсаулығына әсер ететін циркадтық ырғақтардың бұзылуы және кешкі уақыттың артық сағатына байланысты жеке және заңды тұлғалар үшін электр энергиясына қосымша шығындар туралы айтылды.
16 шілдеде өткен екінші отырыста медицина, хронобиология және энергетика саласындағы сарапшылар петиция авторларының қойған сұрақтарына жауап берді. Жұмыс тобының мүшелері мен сараптамалық қоғамдастықтың екі отырысы барысында ұсынған ұсыныстары мен дәлелдерін ескере отырып, ИСМ петиция мәні бойынша шешім жобасын әзірлеп, қоғамдық талқылауға ұсынды.
Негізгі дәлелдер:
Энергия тұтыну
Энергетика министрлігі мен ҚР ҰЭМ Табиғи монополияларды реттеу комитетінің деректері бойынша уақытты ауыстыру елдегі электр энергиясын жалпы тұтынуға айтарлықтай әсер еткен жоқ. 2023 жылы энергияны тұтыну 2022 жылмен салыстырғанда 1,9% -ға артты, бұл тұтынушылар мен жаңа объектілер санының өсуіне байланысты. 2024 жылдың бірінші тоқсанында жан басына шаққандағы электр энергиясын тұтыну 2023 жылдың ұқсас кезеңімен салыстырғанда 2,44% -ға төмендеді. Сонымен бiрге кейбiр өңiрлерде тарифтердiң өсуi мен температураның төмендеуi байқалды, бұл халықтың шығыстарына әсер етуi мүмкiн.
Денсаулыққа әсері:
Қазақстанның Денсаулық сақтау министрлігінің ақпаратына сәйкес, UTC + 5 сағаттық белдеуіне көшіру географиялық орналасуы мен табиғи күн цикліне сәйкес келеді. Бұл биологиялық ырғақтарды күндізгі-түнгі табиғи циклмен үндестіруді жақсартып, халықтың денсаулығына оң әсер етеді. Алайда, уақыт белдеуі ауысқанына бар-жоғы 5 ай өтті және денсаулыққа елеулі әсер ететіні туралы айтуға әлі ерте. Жұмыс тобы Денсаулық сақтау, Білім және ғылым министрліктеріне алдағы үш жыл ішінде бірыңғай уақыт белдеуінің халық денсаулығына әсерін зерттеуді ұсынды.
Талқылау қорытындысы бойынша сауда және интеграция вице-министрі Қайрат Балықбаев барлық қатысушыларға белсенді қатысқаны және шешім жобасын талқылауға сындарлы үлес қосқаны үшін алғыс білдірді.
"Бүгін біз петицияны қарауға қатысқан барлық тараптардың пікірлерін естідік. Петицияда көрсетілген дәлелдер расталмағанын ескере отырып, жұмыс тобы петицияны қанағаттандырудан бас тарту туралы алдын ала шешім қабылдады. Қазақстан Республикасы Әкімшілік іс жүргізу кодексінің 90-6-бабының 3-тармағына сәйкес ҚР Сауда және интеграция министрі петицияны қарау нәтижелері туралы ресми хабарламаны ұсынады. Бұл хабарлама Министрліктің ресми сайтында жарияланады ", - деп атап өтті Қайрат Балықбаев.
